熱愛優質生活

鴨宴最佳選擇!香港兩大烤鴨店精選

記得第一次食烤鴨係小妹好細個嘅時候,父親大人帶我去酒店中菜廳,當時嘅我第一次見師傅喺我面前表演片鴨雜技,感覺新奇又有趣,北京填鴨就成為咗我鍾意嘅中菜之一。大個咗之後,試過去北京旅行,當時食咗「大董烤鴨店」嘅正宗北京烤鴨,味道畢生難忘,好想食多一次,但旅行選擇地太多,北京有排都未到,惟有喺香港尋味,只可惜大部份餐廳打正旗號索價不菲,要搵到性價比高嘅烤鴨店好難,而以下兩間,小妹覺得價錢親民,味道亦唔錯,值得推介畀大家。

第 1 站 美中‧鴨子 $158半隻北京烤鴨

位於尖沙咀大型商場入面嘅「 美中‧鴨子」,係連鎖式餐飲集團旗下嘅餐廳,中菜一向畀人Old School嘅感覺,但係呢間京菜館就以年輕食客為對象,將烤鴨變成Fashion!店舖主打嘅「烤北京填鴨」($158/半隻)係兩食,即片皮同鴨湯,呢個係一般烤鴨店嘅做法,對食開烤鴨嘅人會好有親切感。店入面嘅鴨全部都係選用上等北京嫩鴨,貪佢油感輕盈,肉質細嫩,烤出嚟嘅鴨外皮脆而內裡軟滑,咬入口之後唔會成口油,罪惡感相對冇咁重,但對於傳統嘅北京人嚟講可能就太寡口。配料方面相對簡單同少,只有青瓜、京醬、京蔥同荷葉餅,食落係最基本嘅味道,層次相對單一,不過,以$158嘅價錢食到半隻優質嘅烤鴨,喺香港嚟講算係難得。 

烤北京填鴨($158/半隻) 

門口係透明玻璃窗,可以見到廚師片鴨!

除咗烤鴨之外,都可以試吓啲新式京菜,好似「桂花糕凍伴鴨件」($804件),上層係已片烤鴨,中層係青瓜同上湯桂花凍,下層就係薯片,賣相精緻的骰,小妹覺得烤鴨同青瓜、桂花凍配合清新,但連埋底下嘅薯片食就好奇怪,口味嘅嘢都係見仁見智,惟我鍾情烤鴨。 

桂花糕凍伴鴨件($80/4件) 

上層係已片烤鴨,中層係青瓜同上湯桂花凍,下層就係薯片,賣相精緻的骰。 

麻醬雞絲粉皮($68) 

田園蟲草花炒翡翠苗($98) 

鴨湯 

 

店名: 美中‧鴨子(M&C‧DUCK

電話:2347 6898

地址: 尖沙咀廣東道17號海港城港威商場33319號舖

營業時間:星期一至日及公眾假期:11:30-22:30 

第 2 站 大都烤鴨 「鴨宴」最佳選擇

同樣位於尖沙咀大型商場,價錢就比「美中‧鴨子」貴少少,但仍然親民,主打嘅「烤北京填鴨」($258/半隻)係我覺得暫時嚟講最好食,青瓜條、京蔥、京醬、荷葉餅係基本配料,但呢度仲有埋紫蘿蔔絲、蜜瓜絲同砂糖,令鴨卷食起上嚟更多口感!烤鴨畀師傅片之前會畀你過目一次,話畀你知隻鴨有幾靚,喺你等嘅期間又會送上飯前水果過吓口癮,認真周到! 

烤北京填鴨($258/半隻) 

點解會話係「鴨宴」嘅最佳選擇?當然係佢推出多款同鴨有關嘅菜式啦!好似「荷葉包鴨飯」、「元貝鴨絲羹」咁,都係鍾意食鴨嘅客人經常嗌嘅菜式。另外值得一試嘅係「淮揚灌湯小籠包」,唔知大家覺唔覺得一般嘅小籠包會有一種奇怪嘅味,但係呢度嘅小籠包就唔會,加上皮薄餡厚,湯汁鮮甜,小妹我一試愛上。甜品「貝勒燕蕃薯」係用反沙芋嘅做法,用燕麥同砂糖炮製甜蕃薯,食落香脆可口,微甜又唔會太漏,用嚟做一餐飯嘅EndingPerfect! 

元貝鴨絲羹 

荷葉包鴨飯 

淮揚灌湯小籠包 

 

貝勒燕蕃薯

店名:大都烤鴨

電話:2628 0662

地址:尖沙咀河內道18K11購物藝術館2221號舖

營業時間:星期一至日:11:30-23:00 

內容評分
評語