邊食邊遊長洲!10大掃街小食店推介

2017.07.27

放假即興來個短假期都會選擇入長洲歎下,除了踩單車和游水之外,美食當然不可缺少,小編今次集合了長洲10間食店,跟住以下路線圖就可以邊食邊慢遊長洲。

第 1 站 紅點

紅點主打多款港式茶餐廳小食,特厚西多士($35)更是店內的招牌美食,中層夾心共有7款口味可以選擇,包括朱古力、咖啡、綠茶、椰香、藍莓、奶油及花生,全部即叫即做,每件原度都有2.5cm,大大份夠飽肚。綠茶味厚西多士面層再淋上滿滿奶油醬,熱辣辣香脆好味,中層夾著的綠茶夾心,食落茶味香濃。 

另有不少炸物小食,鳳尾蝦金門薯卷($38)以薯仔絲包圍著蝦炸成金黃色,另配有沙律醬,一份有5件,可以同朋友齊齊Share食。 

店內的飲品選擇選亦不少,粉紅色的夢奶雪香($18)即士多啤梨沙冰冰,果味香甜適合夏日消暑。帶淡淡芝麻香的芝麻珍珠($18),充滿香滑奶味,配上煙韌的珍珠更有口感。

地址:長洲新興街65號地下

第 2 站 海盜王張保仔

以鮮果小食及飲品為主的海盜王張保仔,首創夏日炎炎必食的薄荷西瓜冰條($20),純天然西瓜製成,每條份量都大過一隻手掌,食落西瓜的果甜味偏淡,但冰涼感十足,消暑一流!

另有造型特別的鮮菠蘿冰條($20),中間的心型由西瓜製成,啖啖充滿香甜菠蘿味,夏天食一樣透心涼。

地址:長洲新興後街152號地下

第 3 站 熊屋

店舖位於長洲較清靜的後街,供應多款口味夾心的梳乎雪枇($15),以外層鬆軟的蛋糕夾著冰凍的雪糕,包括牛奶朱古力脆脆、莫卡咖啡學容力脆脆、雲呢拿、綠茶紅豆味。小編推介綠茶紅豆雪批帶淡淡茶香,中間夾著紅豆粒,咬落雙重口感。店主更建議先解凍數分鐘,再食用口感會更軟滑。

另有店主特別推介的榴槤梳乎雪枇($20),食落榴槤味道香濃,內層更夾有果肉,口感更豐富,愛食榴槤的話不可錯過。

地址:長洲大新後街114號地舖

第 4 站 長洲平記

店內除了招牌的芒果糯米糍外,另有焦糖芝士雪糕撻($25),鬆脆的酥皮撻底加上冰凍的芝士雪糕後,再即叫即燒面層的焦糖,將冷熱口感集中於一身。

雪糕撻份量不多,撻皮口感鬆脆,芝士雪糕味道濃郁質感軟滑,但夏天食的話,雪糕溶化速度較快,有可能食得較狼狽。

地址:長洲北社海傍路19A號地舖

第 5 站 艾堡餐廳

餐廳設有外賣小食專櫃,全部即叫即製,價格亦較堂食便宜,方便食客邊行邊食。份量頗多的炸魷魚鬚($30)香脆可口,炸粉份量適中,魷魚鮮味十足,加上檸檬汁味道更突出。

另帶同樣即叫即製的焗生蠔($40),面層佈滿厚厚白汁洋蔥芝士醬,份量多得能拉出芝士絲,味道香濃,雖然生蠔較細,但作小食也是不錯的選擇,芝士迷可以一試。

餐廳外的環境亦相當優美,落單後等待食物時,更可以同朋友影相打卡。

地址:長洲東灣路12-14號地舖

第 6 站 珍珍小食

店內有不少港式街頭小食,而當中暖為特別的就是香蕉燒($16),以雞蛋仔外層包圍著原條香蕉,面層再淋上沙律醬,每條新鮮即叫即燒,所以需要耐心等待約5分鐘。新鮮製成的香蕉燒味道偏甜,與沙律醬不太配合,且質感偏軟身不夠香脆。

 

另有芝士蟹柳燒($16),內層夾有蟹柳及芝士,味道偏鹹,與沙律醬較配合,亦不少過膩的感覺。

第 7 站 漁樂

海鮮小食店由土生土長長洲人前DJ Marco 開設,主打每日本地即捕的新鮮海鮮小食。Menu由當日的時令海鮮決定,每日限定4款,保證新鮮。香炸吊筒($40)用了夏日當造的吊筒魷魚仔即叫即炸成,味道鮮甜爽口,配上日式芥辣醬,酸甜不膩。

鮮炸池魚($40)香脆不腥,加上原條小心去骨,啖啖肉。蘸上蛋黃醬,頓間變成西式炸魚。

 

魚仔濃湯($25)用了當日當造魚仔煎香後,加上加胡椒及鹽煲成,鮮味十足不腥。最後加上香葱及紫菜,足料美味。

地址:長洲大新海傍路81B地下

第 8 站 藍鳥

藍鳥是長洲街坊的宵夜之選,由街邊檔開到入鋪位。招牌香辣炸雞髀($20)大大隻即叫即炸。表面撒上孜然辣粉,香脆惹味不油,更可選擇由不辣至大辣的辣度。

蠔仔肉碎粥($33)單看賣相其貌不揚,但味道卻令喜出望外。蠔仔足料飽滿,配上如肉餅般的調味肉碎,加入大地魚熬成更鮮味。 

地址:長洲大新街33號地鋪

第 9 站 The Pink Pig Music Bar and Restaurant

位於海旁的酒吧主打多款香脆佐酒小食,水牛城雞翼($30)炸雞翼香脆,甜中帶辣,非常開胃。

炸芝士波($26)即炸水牛芝士粒,襯熱咬開更有拉絲,鹹香煙韌,送酒不錯。

地址:長洲建新里11號地下

第 10 站 漫活堂

 小清新休閒Cafe設多款自家製雪糕如豆腐、紅茶、生薑及抹茶等口味。推介薑味雪糕($28/單球,$38/雙球)香滑味似薑汁撞奶,非常特別。

雲呢拿焦糖窩夫($58)另配紅茶雪糕(加$18)蘋果清新不太甜,與清香的紅茶雪糕非常夾味。

地址:長洲新興街83號地下

活動資訊

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【免費試用🎁】RMK全新底妝系列!↓

↓全新原生光感隔離霜 x 零瑕絲絹粉底液↓

↓全新原生光感隔離霜 x 零瑕絲絹粉底液↓

↓【免費送🎁】DPM點對點®床褥!!!↓

↓ 仲會幫您度身訂造出最適合的床褥 ↓

↓ 仲會幫您度身訂造出最適合的床褥 ↓