熱愛優質生活

元朗6間掃街食店推薦 香脆熱浪薯條+軟糯芋圓+現煮珍珠飲品

2017.11.18
住九龍區/港島區的朋友可能掃街掃到悶,放假的話不妨到新界走走!近月元朗就開了不少新店,由串燒小食,至飲品糖水都有,包你由朝食到晚都無難度。

第 1 站 巴打小食

掃街唔少得食熱辣辣的串燒,巴打小食有多款不同的串燒,雞、牛、豬、羊都一應俱全。怕熱氣可選醉雞卷($18)/醉鮑魚($10)等小食,價錢相宜。

雞、牛、豬串燒($10),雞肉/牛肉嫩滑,肉味香濃多汁,,豬串較嚡口,稍稍失色。

熱浪薯條($13)十分香辣,味道同熱浪薯片有幾分相似。薯條外脆內軟,食到啖啖薯仔蓉。

 

地址: 元朗民合徑8號幸福樓二期地下6號鋪

第 2 站 炫津

 小食店主要做街坊生意,放學時間有不少學生光顧,堂食約有10個座位,環境乾淨企理,以外賣生意為主。

酥炸鮮蝦雲吞($15/6粒)外皮卜卜脆,蘸上酸辣醬後夠哂香口,豬肉味較蝦味重。

秘醬炒雞翼尖($12/12隻)即叫即炒,要等5-10分鐘炒香,微辣惹味,不過略嫌唔夠入味。

碗仔翅($16),以素翅、肉、冬菇煮成,素翅大大條有口感,十分足料。

 

地址: 元朗洪水橋洪堤路3號麗珊閣地下4-5號舖

第 3 站 樂園小食

樂園小食店面較細,門外有少量座位,同樣有不少街坊及學生午後時間買糖水食,每日有兩款自家製糖水,可以另加芋圓。 

杞子花鵰醉雞翼($22/3隻 $30/5隻)酒香味濃,雞翼大隻夠滿足。

三色芋圓紅豆涼粉 ($25),芋圓地瓜圓軟糯,不算彈牙口感實在,食到淡淡芋頭/蕃薯味。

車仔腸粉餐($10/5條 加咖哩阿根廷魷魚$11) ,魷魚微辣入味。

 

地址:元朗屏山塘坊村13號地下

第 4 站 春風三月

新開台式飲品店,每日現煮7款口味珍珠,屬區內人氣長龍店。 店主到台灣學師,再發揮創意,創造出7款手製珍珠,包括黑糖珍珠、玫瑰珍珠、桂花珍珠、baileys珍珠、火龍果珍珠、芋頭珍珠、百香果珍珠,配搭不同飲品。

奶蓋Baileys復刻紅茶 ($34),芝士奶蓋鹹香濃厚,紅茶清甜不膩,配上微甜煙韌Baileys珍珠。

Double芋頭奶($36),以芋頭鮮奶配芋頭珍珠,比芋圓更煙韌,啖啖都飲到綿密芋頭泥,不過就較飽滯,一個人未必飲得完一杯。

 

地址:元朗千色匯地下G34號舖

第 5 站 羅東肉焿番

搬到新址的羅東肉焿番標榜是正宗台灣菜,總店位於宜蘭,售賣多款簡單台式小食,有台灣寶島風味。而且餐廳下單後約5分鐘就送到,非常有效率。

羅東肉焿湯配粒粒冬瓜茶($47),湯地稠身, 有6-7塊肉,肉質彈牙。冬瓜茶清甜,每杯都有少量冬瓜條。

肉燥乾拌面($35)肉碎香口,麵質略腍,刀削麵與肉燥的配搭不錯。

連皮冰烤蕃薯($12),香甜可口,可以作為餐前小食或飯後甜品。

 

地址:元朗鳳翔路69號建輝大廈地下5號舖

第 6 站 Scaredy Cat Ice Cream and Coffee Shop

 以雪糕及飲品為主,顏色搶眼吸引,影相呃Like最適合!店家不定時都會推出新產品吸引顧客,外表加哂分。

美人魚造型雪糕珍珠筒($45),價錢偏貴但夠大枝,二人分享都無問題。以海鹽雲呢拿味雪糕配上美人魚主題糖十分吸睛,不過較甜,外表勝過味道。

 

地址:元朗又新街27-29號建威大廈地下8A舖

內容評分
評語