正在閱讀
【香港仔好去處】$60玩盡香港仔+鴨脷洲!艇仔粉/素翅撈飯/日落

【香港仔好去處】$60玩盡香港仔+鴨脷洲!艇仔粉/素翅撈飯/日落

2018.05.25

最近天氣咁好,趁假期當然要約朋友去玩返一日啦!仲未諗到去邊玩的話,不妨考慮一下香港仔+鴨脷洲一日遊啦!今次帶大家去食地道又足料艇仔粉,再搭街渡去鴨脷洲掃街,最後可以去埋睇日落靚景,飽覽整個香港仔港灣,輕輕鬆鬆過一日!重點係整個行程只需要$60就可以玩足一整日,預算唔多的朋友都唔怕~

第 1 站 香港仔流記艇仔粉 地道風味又足料!

去到香港仔一帶當然要試試地道艇仔粉啦!以前想食艇仔粉只可以靠運氣,不過現時流記艇仔粉就提供電話,去之前可以打電話確認位置,唔會白去一場!艇仔粉用了梭羅魚及大地魚熬製的湯底,味道鮮甜,配料就有燒鴨、魚蛋、紅腸等等,$28就食到一碗,足料又有風味!

第 2 站 搭街渡去鴨脷洲 沿途欣賞港灣景色

食完艇仔粉就可以直接在碼頭搭街渡去鴨脷洲,沿途仲可以欣賞到港灣景色,吹下海風,好舒服!船費方面大人$2.2,小童$1.2。

第 3 站 鴨脷洲大街 掃平價小食

去到鴨脷洲當然要去掃街,鴨脷洲大街有好多平價小食,心水推介愛。小食$19就有一碗素翅撈飯,份量都唔少。而附近友和士多仲有多款懷舊小食,$5砵仔糕、$3茶果,好抵食!

第 4 站 南朗山 黃昏日落海景

食飽就要運動一下,出發去香港仔附近的南朗山睇靚景!沿著南朗山道上去,就會見到上山的樓梯。沿途行上去可以遠望海洋公園,到達後仲可以望到鴨脷洲海景和港灣一排排的船,途中亦可以到南朗亭休息,舒服寫意!記得等到黃昏時間睇埋日落美景先走!