正在閱讀
【元朗好去處】元朗影相掃街週末一日遊!向日葵花海免費任影+滿瀉鰻魚蛋治

【元朗好去處】元朗影相掃街週末一日遊!向日葵花海免費任影+滿瀉鰻魚蛋治

2018.07.08

夏天係向日葵盛放的季節,鍾意太陽花的朋友唔使去到日本台灣,原來香港都有一大片向日葵花海,現時仲免費開放俾遊客任影靚相,週末放假未諗到去邊玩的話,可以約埋三五知己一齊去呼吸一下大自然的空氣!今次推介大家一條元朗影相掃街週末一日遊的路線,賞完花影完靚相再去醫肚,試勻滿瀉鰻魚滑蛋治同嘆甜品,玩足一日!

 

第 1 站 元朗新田信芯園 免費任影壯觀向日葵花海

香港元朗新田信芯園今個夏天種滿太陽花,場內有多片向日葵花海,而且仲免費入場俾大家賞花影靚相,整片花海都係影相位,又靚又壯觀,花海部分位置仲可以行落去影相,不過緊記要守規矩,唔好採摘同走入禁區,愛護大自然!

另外農場內仲有向日葵出售,想拎住向日葵影相可以用$40買一支或者$100買三支,影完帶返屋企仲可以放到一星期左右~

 

詳情:

地址:元朗新田小磡村信芯園(*暫定開放至7月中後期)

交通:紅色小巴17/綠色小巴78/九巴76K於元朗/上水/錦田上車,石湖圍巴士站下車。

留意事項:綠色小巴76是小磡村兵房一帶村民最重要的交通工具,請優先讓小磡村村民使用。請各位駕駛人士注意:由於村內通道狹窄、沒有車位,請務必使用公共交通工具,將車輛停泊在上水/元朗轉乘巴士/小巴。

 

 

第 2 站 龍鳳店 超足料滿瀉鰻魚滑蛋治

睇完花搭小巴出元朗市區醫肚!元朗小店龍鳳店主打蛋治,心水推介超足料的龍鳳鰻魚蛋治($40),滿瀉滑蛋包住整份蛋治,加啖啖鰻魚肉味道好夾,而且口感好豐富,值得一試!店內仲有其他口味的蛋治,全部都即叫即整,新鮮熱辣辣~


詳情:

地址:元朗水車館街66號錦榮大廈地下3B號舖

第 3 站 旮旯  香濃抹茶紅豆卷蛋+麥提莎糯米糍

食完蛋治未夠飽?再去食個甜品就剛剛好~由網店變身實體店的旮旯主打招牌抹茶卷蛋($30),抹茶味香濃偏甘,唔會太甜膩,入面的抹茶紅豆忌廉軟滑,鍾意抹茶的朋友可以試試~另外仲有其他甜品如麥提莎糯米糍(28/6粒),糯米糍口感煙韌,不過略嫌抹茶味唔夠突出,反而芝麻口味較濃郁可口。

 

詳情:

地址:元朗裕榮徑11號好旺洋樓地下16號舖

第 4 站 又新街掃小食  夢幻粉藍色海鹽雲尼拿雪糕

行一陣可以再去元朗又新街一帶掃小食,一條街可以掃勻唔同的特色炸物、港式小食、甜品、壽司手卷等等,而Scaredy Cat Ice Cream雪糕店早前就推出了少女風主題雪糕,粉藍色海鹽雲尼拿味雪糕($45)外型好夢幻,海鹽味道突出,幾特別!小店最近更推出近期大熱的黑糖珍珠鮮奶茶($20),黑糖味濃,不過略甜,唔鍾意太甜的朋友記得少糖!


詳情:

地址:元朗又新街27-29號建威大廈地下8A舖

 

 

評語

Max Ray
Max Ray 簡直係世外桃園
12/07/2018 15:02