正在閱讀
【西灣河好去處】西灣河+鯉魚門漁村一日遊 燈塔日落/巨石牆/廢墟石屋

【西灣河好去處】西灣河+鯉魚門漁村一日遊 燈塔日落/巨石牆/廢墟石屋

2018.07.21

好多人週末放假都好鍾意去港島區行下影靚相,但其實除了中上環有好多影相好去處之外鯉魚門都有不少靚景。今次就帶大家由西灣河出發,先到太安樓掃街填飽個肚,之後就再搭懷舊小輪到鯉魚門三家村一路食懷舊小食一路影靚相!

第 1 站 西灣河太安樓 地道小食/糖水甜品應有盡有

首先大家可以去有西灣河小夜市之稱的太安樓掃街食下小食。太安樓食肆林立,日式手卷、地道小食、糖水甜品咩都有,大家可以按自己的喜好去掃街。小編心水推介就有鴻記的朱古力格仔餅($23),格仔餅非常厚身,而且十分足料,啖啖都食到朱古力醬同煉奶。

地址:西灣河筲箕灣道57-87號

小食資料:

艾.蜜思 3色芋圓水果撈($28)

鴻記 朱古力格仔餅 ($23)原味雞蛋仔 ($20)

櫻 三文魚拼海膽手卷 ($36)

第 2 站 西灣河渡輪碼頭 體驗懷舊小輪風味

掃完街之後,大家可以直行到西灣河碼頭,搭懷舊小輪出發去充滿漁港風情的三家村。西灣河同三家村碼頭都充滿懷舊的香港特式,大家等船的時候可以欣賞一下。而懷舊小輪的內部設計亦有好多以前漁民打魚時的工具作佈置,大家可以一邊參觀船內設計,一邊欣賞海上景色,渡輪船費為$9。

地址:愛秩序灣太康街45號西灣河渡輪碼頭 

交通:懷舊小輪交通時間表

第 3 站 鯉魚門三家村 即買即整海鮮+懷舊小食

三家村是一個位於鯉魚門一帶,由三個姓氏構成的村落,村中氣氛淳樸充滿漁港風情。附近有好多海鮮檔同酒樓,大家可以買完海鮮就到酒樓即刻煮,即買即煮超新鮮。另外,三家村內亦有一些售賣懷舊小食的店舖,有即燒牛肉乾,雞仔餅等等,大家可以買來再次品嘗童年的味道。

第 4 站 鯉魚門石礦場 廢墟石屋+巨型石牆影相位

經過海鮮街再行一段路之後就會到達石灘,石灘廢墟感十足,大家可以去影下相。之後就沿住小路向前行就到達石礦場。礦場有一大片草地同石牆,環境幽靜,放鬆一下心情一流。

注意:去礦場的部分道路需要行石梯,大家要小心安全,而且有部分路段會經過民居,經過時記得盡量減低聲浪,避免為居民造成騷擾呀~

第 5 站 燈塔日落 拍剪影相一流

探險完可以去三定家村的燈塔睇日落,影下剪影相留低美好回憶,作為一日遊的終點站。不過大家記得要好好愛惜大自然,不要破壞環境同亂扔垃圾~

免費登記成為U Lifestyle 會員
即時接收最新資訊並盡享獨家優惠

免費登記成為U Lifestyle 會員
即時接收最新資訊並盡享獨家優惠