正在閱讀
【灣仔好去處】灣仔街頭遊走影相掃街遊 彩虹樓梯/北京煎餅/蟹子章魚燒

【灣仔好去處】灣仔街頭遊走影相掃街遊 彩虹樓梯/北京煎餅/蟹子章魚燒

2018.07.27

香港地方細細,周末放假當然想出街玩,最近適逢暑假,灣仔除了可以行書展和動漫節舉行外,該區都有不少靚景和掃街小食可以邊歎邊影靚相!今次就大家到彩虹樓梯影靚相,再歎北京烤鴨煎餅、蟹子章魚燒、焗薯蓉等街頭小食,最後再欣賞日落維港,玩返個周末本地遊!

第 1 站 御廚煎餅 熱辣辣北京煎餅

來到灣仔的第一站,當然要先醫醫肚!這間街頭小店主打煎餅,依照北方煎餅的製作方法所製,傳統的口味就有北京烤鴨口味($36),夾有京蔥鴨肉、蘿蔔絲、青瓜絲、薄脆和生菜,加上雞蛋和甜麵醬,香脆惹味。另外仲有多款特色口味配搭,至啱喜歡嘗試新口味的朋友。

 

地址:灣仔灣仔道181A-181G

開放時間:10:30am-10pm

第 2 站 食字號 街頭歎勁爆蟹子章魚燒

章魚燒食得多,但特色口味的章魚燒又有無試過?位於灣仔交加里的食字號,主打多款口味的章魚燒,款款都夠晒特別,仲出奇地配搭。勁爆蟹子章魚燒($35),章魚燒面層佈滿蟹子,配上章魚燒食,相當有口感。愛食章魚燒的朋友,仲可以試埋其他口味~

 

地址:灣仔交加里51號保和大廈地下J2號舖

開放時間:12nn-7pm

第 3 站 遊走灣仔小區 漫步秀華坊彩虹樓梯

去過韓國旅行的朋友,都知韓國的壁畫村彩色樓梯,但又知唔知原來香港都有彩虹樓梯?樓梯位於灣仔秀華坊,屬區內寧靜清幽之地,更是藝術氣息集中地,附近仲有多間文藝小店。各位在彩虹樓梯影完相打卡後,不妨可以順便在附近遊走,可以發現到有趣壁畫外,仲有不少文青氣質小店,走著走著就能消磨一個下午。

 

地址:灣仔秀華坊

第 4 站 樂天烘焙 出爐滋味焗薯蓉

行到攰當然要食返小食,樂天烘焙是位於天樂里多年的麵包店,陪伴區內街坊成長。除了麵包同蛋糕外,店內仲有焗薯蓉出售,有栗米蘑菇、栗米火腿,煙肉、蟹柳等口味。煙肉焗薯蓉($17)同栗米火腿($17)同樣都是配料加上沙律醬,味道夾之餘食落香滑,好啱當作下午茶點!

 

地址:灣仔天樂里15

開放時間:7am-9pm

第 5 站 碼頭天台觀景台 欣賞黃昏日落維港

最後當然要睇返個日落靚景作完結!灣仔碼頭頂層的公眾觀景台,該處飽覽廣闊維港景色,仲可以欣賞到天星小輪,來回九龍和香港之間的風景,好適合黃昏時份或晚間時份,欣賞維港美景。

 

地址:灣仔碼頭頂層

開放時間:7am-11pm