【上環好去處】上環壁畫街影相半日遊 歎樽仔奶茶/蛋牛包/榴槤蛋撻

位於上環市政大廈熟食中心內的瑞記咖啡，開業多年，屬區內有名的食店。店內的樽仔奶茶（$16）相當出名，是不少食客必叫的名物，飲落香滑，奶味香濃。另外蛋牛包（$16）和西多士（$25）同樣值得一試。蛋牛包中夾著煎蛋碎牛，食落外脆內軟；沾滿蛋漿煎香的西多士，食落香口，最啱配樽仔奶茶一齊食！

地點：上環市政大廈2樓熟食中心17號舖

營業時間：星期一至六 7:30 am– 5pm／星期日全日休息

上環的太平山街、四方街、西街及水池巷一帶，有不少創意藝術街頭壁畫，故有壁畫街之稱。多種風格的壁畫都有，全部設計特別，可以慢慢影相打卡。由於壁畫神出鬼沒，有可能在店舖旁、後巷或鐵閘上，有心人需要慢慢尋寶，先可以搵出壁畫，所以好適合花一個下午在附近遊走。

地點：太平山街、四方街、西街及普慶坊；部分於城隍街、荷李活道

行完街當然要歎小食休息一下！主打酥皮蛋撻的酥妃皇后，於上環設有分店。愛食榴槤的朋友，可以一試店內的榴槤蛋撻（$18），酥皮鬆脆，榴槤味香濃。不愛食榴槤的朋友，可以一嚐芝士蛋撻（$18）或原味蛋撻（$10），一樣香脆好味。

地點：上環蘇杭街2-24號啟豐大廈地庫5號舖

營業時間：星期一至六 11:30am – 7pm／星期日全日休息

最後食完野可以到海濱長廊散步，可以欣賞到維港景色，沿路散步至中山紀念公園，仲有花園草地等悠閒美景，適合消磨時間外，日落時份仲欣賞到黃昏美景。

地點：上環海濱長廊、中山紀念公園