正在閱讀
【大埔好去處】$90大埔掃街影相玩一日!金莎格仔餅/足料漢堡/壁畫/腐竹雪糕

【大埔好去處】$90大埔掃街影相玩一日!金莎格仔餅/足料漢堡/壁畫/腐竹雪糕

2018.09.30

平時放假約朋友出街來來去去都係去商場睇戲行街玩到悶的話,可以試試走入大埔玩一日!大埔區有不少街坊小食店,掃街食足一日無難度,仲可以去埋附近景點影吓相,輕輕鬆鬆渡過週末。

第 1 站 Burger Kitchen  街坊價食超足料漢堡

Burger Kitchen主打超足料漢堡, $49就食到一個經典牛肉漢堡,份量十足。午市時段去食的話$58就有埋餐湯或沙律及飲品,好抵食!另外店舖仲有意粉、蛋糕、咖啡等,咖啡可以自選卡通圖案,去開大埔可以去試試~

地址:大埔安慈路2號八號花園地下3號舖

第 2 站 雞蛋仔專門店  多種口味格仔餅/雞蛋仔+傳統冷糕

雞蛋仔專門店有多種口味格仔餅及雞蛋仔出售,比較特別的有草莓醬、芒果醬格仔餅,心水推介金莎朱古力味格仔餅,啖啖朱古力醬加花生粒,口感豐富!另外仲有傳統冷糕,冷糕入面放滿牛油、砂糖、椰絲、花生,外皮鬆脆可口,鍾意食格仔餅等小食的朋友可以去試試!

地址:大埔安慈路4號昌運中心榮昌閣地下14A號舖

第 3 站 香港鐵路博物館  火車/路軌影相位

食飽可以去香港鐵路博物館影相,博物館入面有舊式車站、火車,另外仲有路軌等影相位,影相靚之外仲可以睇埋香港鐵路歷史。

地址:香港大埔大埔墟崇德街13號

第 4 站 樹記腐竹  100%天然腐竹雪糕

影完相最好就食返杯雪糕消消暑,樹記腐竹係一間老字號,除了有售腐皮腐竹之外,仲有自家製作腐竹雪、雪條,更係採用100%天然腐竹製成,低脂低糖,口感香滑,腐竹味都算濃郁,幾特別!

地址:大埔運頭街71B & C號地下

第 5 站 大埔社區中心  大埔特色建築壁畫

去樹記腐竹沿路會經過大埔社區中心,社區中心外牆有一幅畫上大埔建築的壁畫,色彩鮮艷搶眼仲好有特色。

地址:大埔鄉事會街2號

免費登記成為U Lifestyle 會員
即時接收最新資訊並盡享獨家優惠

免費登記成為U Lifestyle 會員
即時接收最新資訊並盡享獨家優惠