【西環好去處】西環古蹟/塗鴉影相遊 歎瀑布芝士三文治/海景日落咖啡

位於石塘咀山道的No Milkshake No Life，主打美式小食和奶昔。店內設計走型格路線外，食物都相當花心思，招牌的瀑布芝士三文治「Crazy！Cheers！Cheese」（$78），以紅菜頭製作的粉紅色賣相吸睛，芝士配上香草醬味道濃郁。記得配返杯奶昔一齊歎，皇牌的焦糖花生醬真脆煙肉奶昔（$54），份量足料，充滿花生醬香味。

地址：西環石塘咀山道31-37號地下A舖

營業時間：星期二至日 10am-6pm

西環有不少舊建築及古蹟，全部都值得遊覽，當中包括英式花崗石建築的西營盤社區綜合大樓，外圍的長廊位充滿歷史感。另有英式紅磚屋舊贊育醫院，現為西區社區中心，及一級古蹟建築歌德式教堂救恩堂，有興趣仲可於指定開放時間入內參觀。

西營盤社區綜合大樓

地址：西營盤高街2號

舊贊育醫院

地址：西營盤西邊街36A

救恩堂地址：香港西營盤高街97A

開放時間: 逢星期二至五 10am-12nn、2pm-5pm

除了上環一帶多塗鴉外，西環亦有不少塗鴉，位於奇靈里的附近有多幅特色塗鴉，當中仲有以本地為主題的作品，好啱食飽到附近散步兼影相打卡，渡過一個下午。

地址：奇靈里、石棧里及忠正街

西環碼頭除了影靚相外，更有一間位於海傍的咖啡小店，擁有無敵靚海景，可以一邊歎咖啡一邊欣賞日落美景。店內的All Blue蝶豆花飲品（$35）賣相吸引，冰搖咖啡（$40）味道甘香，最啱對住大海歎一杯，為周末假期畫上完美句號！

地址：西環中西區海濱長廊

營業時間：星期一至五4pm-9:30pm/星期六及日2pm-10pm