右手係我女朋友
文：藍橘子
「我好嬲，我真係好嬲，
唔係因為呢個叫「大榴槤」嘅網偷我文。而係「大榴槤」呢個名得真係改得好難聽，仲有點解要夾硬幫篇文改個作者名呢？「右手係我女朋友」？！
好好笑咩吓？弱智！」
為咗令呢個Post更能夠廣傳開去，我決定用《右手係我女朋友》寫個故事！畀佢知道，得罪痴線佬有咩下場！
我叫阿臣，由細到大我都未拍過拖，自從睇咗一套動畫叫《寄生獸》之後恍然大悟，既然主角可以當隻右手係朋友，我都可以當右手係女朋友。再加上，我同隻右手相處咗廿幾年，佢服侍得我無微不至。
「妳…可唔可以做我女朋友？」我問右手。佢有啲震，掌心仲泛紅發熱，佢怕羞。畢竟係第一次同人告白，當時我都好緊張，成個人都震晒。
「唔答我當妳應承啦～」
拍拖真係可以改變一個人，由右手答應做我女朋友嗰一刻起，我覺得自己成個人都好似脫胎換骨咁，就連行步路都自信過人，為咗唔好影衰女朋友，我去咗Ｕ記買衫脫毒，女朋友幫我揀咗幾套衫，仲偷偷哋趁sales唔覺意跟埋入試身間望住我換衫，咁大個仔除咗我阿媽都未畀其他女性望過我身體，仲要係公眾場所，真係好刺激。
「啲嘢咁重，等我拎啦～」買完衫，我用左手將右手袋衫搶走，盡顯紳士品格。
我同女朋友發展得好順利，唔夠兩日就發生咗關係，自此之後就變得更加密切，我買咗好多飾物畀佢戴，又會幫佢化妝，搽指甲油，搽唇膏，不過佢好佻皮嫁，次次搽完唇膏都鍚到我周身唇膏印。前排仲儲夠錢同佢去咗日本旅行，去京都著和服影相，佢著住和服真係好靚，當日影咗成千幾幅相。
女朋友好鍚我，唔會阻止我買figure仲會同我一齊打機。當然我都好鍚佢，唔想佢太粗勞，所以我連寫字都開始轉用左手，唔用筷子轉用叉食飯。
光陰似箭，我同女朋友一齊咗半年，亦同居咗半年，所有情侶會做嘅嘢我哋都做晒，我覺得…係時候應該畀個名份佢！我下定決心，將屋企所有figure同漫畫都變賣晒，雖然女朋友無出聲，但我知道佢唔鍾意我成個毒男咁，正如好多女仔都唔鍾意一樣！除此之外，我仲開始每日跑步，每星期去健身，執返靚個package，將自己改造成阿臣Mark II。
到我認為自己已經配得起女朋友，就瞞住佢買咗一隻鑽石戒指同一隻結婚戒指。反正佢戴等如我戴，考慮到結婚同將來嘅開支，所以婚戒我只買一隻。
相識紀念日當天，我同佢食完個好浪漫嘅燭光晚餐，就帶佢去中環碼頭坐摩天輪，當摩天輪去到最高位，我就拎隻戒指出黎向佢求婚。
「Will you marry me？」
女朋友無出聲，只係默默咁伸隻手出黎…我亦輕輕咁幫佢戴上求婚鑽戒，好彩！尺寸非常適合！證明我都好瞭解我女朋友。
求婚成功之後，我隔日就立即帶埋佢去婚姻註冊處登記排期，我仲以為人生會一帆風順，估唔到…就喺呢個咁重要嘅時刻，會遇上阻滯。
「先生，你咁樣我哋唔可以幫你辦理結婚手續…」註冊處職員。
「你係咪歧視同性戀？你講！」
「唔係…」
「咁點解啊？！我連婚戒都買埋！」
「先生！一個人係唔可以結婚嫁！」
「……」我靜咗，我唔識答。
「呢個咪係我未婚夫囉！你盲嫁？」突然間，旁邊counter有人爭執緊。
「小姐，妳隻手同妳只能夠當係一個人…」我望過隔離，有個女仔佢左手套住一個Minion公仔。
「佢有名嫁！佢叫阿Bob啊！」女仔理據力爭。
我雖然唔認識個女仔，但我一望見佢，就知道發生咩事…於是，我行埋去。
「小姐，不如我哋結婚。」
個女仔望住我，又望一望化咗淡妝，戴住隻鑽戒嘅女朋友，佢都立刻察覺到，我係同佢同病相憐嘅人。
「好，我同你結婚。」就係呢個衝動嘅決定，我同咗一個有相同遭遇，但未見過面嘅女仔結婚。個女仔叫善兒，佢都同我一樣，男朋友阿Bob前幾日同佢求婚，然後就立即衝過黎註冊結婚。我隻結婚戒指唔啱善兒戴，佢買隻戒指對我黎講亦都太細隻，所以我哋戴返自己買畀自己嘅婚戒。
「不如，畀我未婚妻，同你未婚夫互相認識一下。」我提議。
善兒除低咗隻手套，緊緊拖住我隻右手。嗰一刻，我好似如夢初醒，眼前嘅迷霧豁然開朗咁。我望住善兒，從佢羞澀嘅表情得知，佢亦都係一樣。我第一次拖住女仔隻手，感覺同拖住自己右手完全唔同…嗰一刻，我先知咩係戀愛。我漸漸忘記咗前度女朋友，善兒亦無再戴Minion手套。
由於我同善兒已經係正式夫婦，亦開始同居，我哋好似一般夫婦咁享受住甜密嘅二人世界。一年之後，善兒仲懷有我嘅愛情結晶添。
婦科醫生話，懷孕期間，盡量唔好有太劇烈嘅運動…為咗ＢＢ著想，我當然聽足醫生吩咐啦。
不過，有一晚我放工返到屋企沖涼，我前度女朋友突然出現黎搵返我！！
「唔得啊！我已經有老婆，我好快仲會做人爸爸添啊！」
佢話只係想同我回味一下以前，絕對唔會話畀我老婆聽。
嗰晚，我喺浴室…出咗軌。
（完，覺得好睇請share，畀多啲人知道「大榴槤」惡行）
本篇圖文獲作者藍橘子授權刊登，未經准許，請勿轉載！
藍橘子Facebook：https://www.facebook.com/BlueGodZi/
作者其他文章：
>> （真人真事）千祈唔好帶女友去環影影城！因為佢會當自己係小朋友！
>> （真人真事）千祈唔好畀女友著和服！因為佢會覺得自己好靚！
>> 點用電話最慳電？
>> 坤哥，一個努力的最好例子
」，
App內睇文同睇片可隨時捕捉U Fun彩蛋，
換領現金券及禮品！
↓【限時搶⚡】The Big Bounce 電子門票！↓
↓ 全球最大充氣城堡/ Sport Slam體育狂熱/黑夜彈跳派對↓
↓ 【毛孩請試用】Royal-Pets蘆薈溫和修護沐浴露！↓
↓去除身體污垢，成分溫和無添加！↓
