【深水埗美食】茶餐廳推下午茶放題　$68任食燒肉/叉燒/油雞/燒鴨/燒排骨

「快靚正燒味粉麵茶餐廳」在深水埗已經開業20年，累積了不少街坊熟客。

茶餐廳主打各式燒味，老闆堅持每日自家醃製，新鮮燒好不會留過夜。

燒味放題$68，由10/9起大約做到十月尾，只限星期一至五14:30-18:30(公眾假期/中秋節會暫停放題)，最後下單時間為17:30，一小時內可以任食各款燒味及白飯粉麵，附送一杯飲品。

$68放題任食燒味包括燒肉、叉燒、油雞、切雞、燒鴨及燒排骨，款式種類多，建議大家先點個拼盤再續樣追加。

推薦燒肉，外皮卜卜脆，肥瘦適中。

叉燒軟腍，頗為香口，質素不錯！

燒鴨偏瘦，胸位略為嚡身，食落有鴨肉香。

油雞、切雞肉質嫩滑，味道不過不失。

燒排骨同樣香口，但建議鍾意啖啖肉的朋友可選叉燒。

放題每位附送一杯凍熱飲品/特飲，紅豆冰、涼粉冰等都可以選擇，其後追加飲品每杯$5。

另外加$20即可升級放題，加碼任食燒鵝、乳豬、西多士及炒粉麵。

乳豬皮薄香脆，燒鵝十分肥美。

$68放題中只有白飯、清湯粉麵可以任食，升級放題後，就可以任食揚州炒飯/雪菜鴨絲炆米/干燒伊麵。

連西多士亦可以任食！可以當飯後甜品~

餐廳希望大家食得盡興同時，不要浪費食物，如發現有浪費情況，餐廳將酌情收費。

食客亦要注意，燒味飽和脂肪含量及鈉含量偏高，食用時記得適可宜止，不要過量。