Free！全民運動日 一家大細齊玩免費康體活動 + 康樂設施
電視都有講「日日運動身體好」！康樂及文化事務署（康文署）舉辦嘅「全民運動日」年年都咁受歡迎！今年嘅「全民運動日」將於8月4 日（星期日）舉行，市民除咗可以玩盡18區指定場地嘅免費康體活動外，仲有好多康樂設施免費開放畀大家使用，由室內設施到戶外設施，甚至係泳池同水上活動中心艇隻等都任君選擇。康文署今年將武術訂為重點推廣體育項目，一連串精彩嘅武術活動陸續有來！
動感3D影相位
康文署喺全港18區指定場地，設置多個跟運動相關嘅3D相片攝影區畀你影相放上網同朋友仔分享！由即日起至2019年8月31日，去各區指定場地影返張動感十足嘅靚相啦！
鼓勵市民 齊齊動起來
大家都知道運動對健康有幾咁重要，但好多人都總係唔能夠坐言起行。康文署為咗鼓勵市民齊齊「動起來」，連續多年舉辦「全民運動日」。今年繼續以「日日運動半個鐘 健康快樂人輕鬆」為口號，免費舉辦唔同嘅康體活動，仲加入好多嶄新嘅互動元素，等大家可以全家一齊大玩特玩！
免費參加精彩康體活動
喺8月4日當日於全港18區指定體育館，都有好多康體活動畀大家免費參與，包括健康講座及運動示範、健體閣、親子體育活動、體育同樂活動、殘疾人士活動，同埋武術示範及同樂活動，畀你親身感受不同體育活動的樂趣。
想參加嘅話，可以於7月15日（星期一）早上8時30分起，到康文署各分區康樂事務辦事處或區內指定場地報名或領取活動券，先到先得。
如想了解多啲武術項目，記得參加武術示範及同樂活動。
羽毛球場於全民運動日都是免費開放予市民使用。
18區康樂設施免費使用
「全民運動日」最令人期待的當然係多項康樂設施免費開放，無論係室內或戶外設施都有！包括羽毛球場、網球場、籃球場、草地滾球場、壁球場、健身室等，就連平時比較少接觸嘅運動攀登牆、射箭場、繩網陣、高爾夫球設施等，只要你預訂時出示埋使用相關設施的認可資格證明，就可以免費使用。
已登記為康文署健身室使用者於活動當日可免費使用健身室設施
7月28日（星期日）早上9時起在康文署各區場地的「康體通」訂場櫃檯（不包括自助服務站）預訂即可！記得每人只限預訂一節免費設施（不論設施類別），先到先得。提提你，公眾游泳池係無須預約，8月4日於泳池各開放段節開始前於入口處排隊即可，額滿即止。
重點推廣武術體育
同以往唔一樣嘅係，今年以武術作為重點推廣體育項目，除了有充滿”勁”量嘅武術示範之外，仲會有好多相關嘅同樂活動提供畀市民參與，愛好武術嘅人士或者初學者都好啱玩㗎！
武術同樂日 見識傳統武藝
今年「全民運動日」以武術為主題，多位武術運動員應邀為大家示範武藝。剛剛舉行嘅「屯門區青年暑期活動開幕禮暨嘉年華」邀請咗幾位曾代表香港出賽世界青少年武術錦標賽同亞洲運動會嘅運動員作即場表演。
黃志光教練為「全民運動日」嘅武術推廣活動悉心安排不少精彩表演，當中有南拳、劍術、太極拳、雙鈎、刀術以及南棍等，觀眾可以欣賞到不同派別嘅武術之餘，仲可以即場參加武術同樂活動！
應邀參與表演示範嘅四位運動員包括（左起）賀曦彤、楊子瑩、楊千締和袁家鎣，佢地都曾經代表香港參與世界青少年武術錦標賽。
曾於世青賽取得冠軍的楊千締表示，練武最重要是基本功，自小鍛鍊有助打好根基。
曾獲2018亞運會銅牌的袁家鎣，自小體弱多病，練習武術後體質改善，她笑言練習更可保持體型健美。
參與同樂活動的小朋友對武術深感好奇，希望能嘗試各類武術。
備註：想參加「全民運動日」就要喺以下指定日子報名或預訂，先到先得！
免費康體活動：
報名日期：2019年7月15日（星期一）上午8時30分開始
地點：康文署各分區康樂事務辦事處或區內指定場地
免費康樂設施：
預訂日期：2019年7月28日（星期日）上午9時開始
地點：康文署各區場地的「康體通」訂場櫃檯（不包括自助服務站）
（公眾游泳池無須預約）
詳情可瀏覽www.lcsd.gov.hk/sfad
資料由康樂及文化事務署提供
活動資訊
- 地址 康樂及文化事務署
港生活人氣好去處
【送禮🎁】送Esther Bunny春日好物🐰！
↓ 登記免費帶走可愛折疊傘 x 保溫杯 ↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
