網民熱議：公屋走廊又闊又通風比私樓完勝？！ 走廊放雜物違例會被罰10萬蚊？

以前細個成日係走廊踢波，成日都踢到人地門口神主牌！
樓主去勻各類型大廈送貨，得出咁樣嘅心得：「私樓啲走廊密不透風，我送親貨等個客開門/落貨都焗到想嘔！但反之公屋走廊又大，又有跳樓位通風，去親都好舒服！」，有同業嘅網民都深有同感：「我送貨送象山村（邨）、華富村（邨）呢啲，通風又涼爽，啲公屋客仲有幾廿蚊貼士」，有昔日住公屋嘅網民表示懷念：「以前細個成日係走廊踢波，成日都踢到人地門口神主牌」，樓主回應：「公屋走廊做得好，先留到人喺度玩！」

不過亦有網民覺得公屋走廊雖然通風好，但有好多缺點：「雖然通風係好，但落雨嗰陣成個走廊地下都係雨水，然後啲人行過之後成地黑色鞋印仲要跣到仆街，又唔會成日有清潔阿姐mon住，一污糟就拖。同埋多數私樓出𨋢行去自己個單位步程頂多10秒，條走廊又唔會好似公屋咁，成日有人企喺度煲煙或者拎住罐啤酒吹水，一條冇人會停留嘅走廊，整到好似公屋咁完全弊多於利」，不過樓主就反駁：「我落雨送貨去公屋，都未見過成地水咁誇！返屋企就話10秒啫，出外唔止啦！呢啲細節位，就睇到建築商冇為住戶同訪客著想」。

樓主認為公屋廊又夠闊又通風，唔少網民仲話細個可以喺走廊踢波。

不過亦有網民話無逢雨天，公屋走廊會積水，又滑又污糟。

私樓發展商賺到盡     走廊窄只因要偷位畀單位
跟住就引嚟網民熱烈討論：點解公屋走廊咁開揚通風，但私樓走廊就又窄又焗？大家都覺得無非係因為私樓發展商想賺到盡：「我估咁設計，可以偷多啲位比（畀）間屋」、「冇錯，公家走廊愈大 ，單位嘅實用面積愈細」、「政府樓唔洗（使）考慮利潤， 私樓逐尺計到盡」、「公屋走廊闊係for火燭走個陣鬆動啲……依家啲私樓真係窄，尤其係新樓（旺角個棟）以前旺角啲唐樓定太子啲舊洋樓都唔會咁窄，依家發展商真心無良到仆街！」，立刻引嚟網民回應：「堅係，去個FD新居，走廊窄到冇可能2個人一齊行！」

不過原來有私人屋苑嘅走廊，係有冷氣喎：「半島豪庭走廊有冷氣，空氣好過我室內長關窗，以前放學夏天最開心係上樓段路，應該好多私樓都有」，但網民反應好大：「走廊都有，邊個交冷氣費？」、「作為業主我只睇到一堆管理費」，葡萄嘅網民無奈咁講：「海之戀、全城匯、環宇、柏敖，無冷氣，焗到仆街！」，樓主就認為：「公屋走廊已經係完美，冷氣係做多咗！」，

半島豪庭走廊原來有冷氣，電費由管理費扣，住戶無奈感歎羊毛出自羊身上。

相比起公屋，私樓走廊又窄又焗，網民都認為係因為發展商將空間盡量留畀住宅單位。

住客放雜物出走廊   屬違反消防條例可罰款10萬？！
亦有網民覺得私樓走廊窄，其實同管理有關：「公共地方少啲，管理成本低，走廊位越大啲人就放單車放鞋櫃放神位，管理嘅嘢你識條鐵咩？！」，有網民覺得喺大廈走廊存放私人物品，就涉及防火問題：「擺嘢係走廊係犯防火條例，基本上管理處要清咗佢，佢哋唔搞，無人跟進咪咁囉！」，事實上，根據《消防(消除火警危險)規例》第3部第14條，無論業主所放嘅物品係咪有阻塞通道，因呢啲雜物會增加火災嘅機會，都同樣屬於違反消防條例，如發現可被檢控，一經定罪可被判第六級罰款（最高達100,000港元），如其後再犯及再被定罪，則可被判罰款200,000港元及監禁1年。

亦有網民覺得私樓走廊窄啲，其實係方便管理。

好多私樓住戶會將雜物放喺走廊，但原來就算無直接阻塞通道，因為有增加火災機會，其實都係違反消防條例，有機會被罰款達10萬港元。

私樓對街位都撥入單位  所以走廊唔會有窗？！
但樓主嘅發帖，引嚟同業嘅網民提出一個大家都未必思考過嘅問題：「我都係做送貨，有冇師兄講下（吓）點解私樓走廊冇活窗？」，有網民回應：「政府要考慮維修，公屋走廊自然通風，唔洗（使）維修；私樓通常都要通風系統，有期樓梯無窗要做樓梯加壓，每年年檢都有排玩，錢從何來？咪就係管理費囉！」、「私樓點解無窗係開則問題，座樓對街位，全部拎去做晒客廳睡房賺錢好過，點會拎來做走廊隻窗？！同黑廁同一原理，你留意下新私樓啲則就明，基本上走廊/廁所係唔對街」，有網民就諗極唔明：「係咪驚有風起火越大，所以都係密封好？不過逃生時咁好侷，熄滅啲煙都要散㗎？！」，不過亦有網民話：「新例走火通道隻窗同其他住戶窗口唔可以近過6米，所以要封窗」。

有網民唔明點解好多私樓嘅走廊會無窗，有人認為向街位置都會撥入住宅單位，故走廊唔會有窗。

text/Joyce
photo/HKET圖片庫

============

同場加映：

【家居達人】日本認證收納師教你！ 整理廁所鏡櫃、鋅盆櫃小貼士！