康和式居屋一梯6至8伙、單位三房兩廁 網民熱議：康和式係咪最好嘅居屋單位設計？

康和式居屋有三房兩廁   似當年私樓間隔
樓主就問到康和式嘅設計算唔算係房屋署所採用嘅大廈設計當中最巔峰嘅則，並指出新嘅居屋設計所擁有嘅問題：「新嗰啲，睡房留左(咗)位預你間嗰個位，留左(咗)電線位比(畀)你擺電視，但要自己間，個減音露台又係除褲放屁(意指多此一舉)」。對於樓主嘅提問，有網民就認為康和式設計非常好，無可挑剔：「屈咗，除咗個名唔係私樓外，無咩可挑剔，三房二廁」、「康和式真心正，資助房屋嚟講。三房連套廁，間隔都似90年代2000年私樓間隔」、「康和全部開門唔見廳，非常好，覺得最差嘅設計係一開門就係廳，電視牆隔離係房門」。

有網民認為部分康和式居屋有三房二廁的單位，與當年私樓間隔相似，並無可挑剔的地方。

筲箕灣東濤苑、沙田愉翠苑等樓齡約有20年嘅居屋，都係康和式設計。

康和式居屋又實用又美觀？仲好過唔少私樓？
亦有網民認為康和式設計嘅居屋可媲美甚至更勝過不少私樓：「康和式無論用料定設計基本上拍得住同期私樓」、「依種居屋最實用，贏左(咗)好多私人樓」、「康和式仲要一梯8火(伙)，大大個lift lobby，住緊真心正過唔少貴價私樓」、「係，一個康和式一個私人參建居屋，有呢兩樣野（嘢）再加上當年居屋每期都咁多供應，直頭唔洗(使)買私樓都得」，有網民更指有唔少嘅私樓有窗台問題，康和式設計嘅居屋更為實用及美觀：「私樓仲要有個xx窗台(當年窗台計埋入尺(呎)數賣比(畀)你)，相較之下康和真係實用美觀兩兼備，唔該房署起番(返)康和，咪再浪費土地起啲濕x奇怪樓」

連好多私樓都有嘅大窗台問題，康和式居屋都無。

網民認為康和式居屋實用之餘亦美觀，由用料以至設計都可媲美甚至更勝過不少私樓。（相片由房委會提供）

浪費走廊空間？外觀唔夠特別？
不過有網民就認為康和式設計亦有壞處，如浪費了走廊位嘅空間；「康和條走廊完全係useless，浪費哂d(啲)位」、「住緊，好唔實用，走廊又闊，大門又有走廊，兩間廁所好大間」，亦有網民認為康和式設計嘅大廈外觀一般：「其實康和外表睇落冇乜私樓味，同和諧差唔多」、「實用無窗台顯得平凡，外觀睇落唔夠特別，私樓就好得多，外觀好有凹凸感」，更有網民指三房單位並不合符市場需求：「3房華而不實，有幾多人可以用盡3房，起咁多3房被人x就真，提升居屋數量好過」

有網民認為康和式設計亦有浪費走廊空間、外觀平凡以及多三房單位不合市場需求等壞處。

舊居屋同公屋好唔同？新居屋同公屋一模一樣？
網民嘅討論亦延伸到比較以新式設計同舊式設計所興建嘅居屋，有網民就認為以往用舊設計所建嘅居屋會同公屋有明顯嘅分別，但新建嘅居屋就幾乎同公屋一模一樣：「康和一層8戶，有d(啲)6戶，最細都成500呎喎，點樣比？而家果(嗰)堆？大部分得3xx咋，同公屋一樣則，基本上唔係居屋，係公屋當居屋賣，以前居屋同公屋分開設計，根本而家果(嗰)d(啲)係撈埋一碟，到時再睇下(吓)變公(屋)定居(屋)，隨時變黎(嚟)變去，以前根本唔係咁，一開始就劃分居屋/公屋」、「新式嗰啲，首先(同)公屋無異，內外都睇唔出係公屋定居屋，以前嗰啲都見到公、居屋係有分別。其次細到離譜。唔俾私人起開放式，但大部分就係開放式，係大啲、細啲既分別」、「係，之後和階式同非標準型係智力例(倒)退」

亦有網民認為以前所建的居屋單位與公屋單位有很大分別，但新建的就與公屋無異，而新居屋單位面積更細得離譜。

text/Jonathan
photo/HKET圖片庫

============

同場加映：

【家居達人】日本認證收納師教你！ 整理廁所鏡櫃、鋅盆櫃小貼士！