網民熱議：康城同西貢村屋點揀好？西貢人口密度低空氣又好？康城冇宵夜食？

康城有大商場但感覺好迫？西貢空氣好但交通唔方便？
樓主就分別列出康城同西貢村屋各自嘅優點同缺點，樓主認為康城嘅好處係樓下就有大商場、保安較好以及交通較方便：「康城，樓下大商場、security比較好、可以唔洗(使)渣(揸)車」，但缺點則為太迫、鄰近地區將有多發展及冇宵夜食等：「感覺太迫、近堆填區遲下附近多發展、焗住幫襯黨(港)鐵、半夜三更冇得食宵夜」。至於西貢村屋，樓主就指有空氣好、較為寧靜及多餐廳選擇等嘅好處：「西貢村屋，密度低空氣好、西貢市中心多餐廳中西式都有、靜」，而缺點就有必需要揸車之餘出入市區又容易塞車以及治安較差：「要渣(揸)車、治安感覺冇咁好、出入市區易塞車」。

網民指康城樓下有大型商場，保安則較好，但卻有太迫的感覺。

網民亦指西貢雖空氣好環境又寧靜，不過交通不便又容易塞車。

視乎邊度返工？視乎村屋質素？揀近市區嘅村屋更好？
對於呢兩個地方應該點揀好，有網民就認為要視乎返工地點：「好睇你返工係(喺)邊，無鐵路(就)要依賴私家車巴士小巴」，亦有網民認為有揸車就一定唔會揀康城：「有車就一定唔(揀)康城」，而有網民就指出亦要視乎村屋嘅質素，因西貢唔同村屋嘅質素有好大嘅差異：「西貢村屋又要睇咩質素，分吃(別)去過兩個fd屋企，一個180度無遮擋海景，一個一打開門口得一米闊嘅通道然後就係兩米幾高嘅圍牆」。亦有網民建議樓主可選如坑口村及將軍澳村等鄰近市區嘅村屋：「坑口村村屋解決以上問題」、「將軍澳村更好，近地鐵咁多」。

有網民認為選擇住邊一個地區先要視乎自己的工作地點。

亦有網民指西貢不同村屋於質素上有很大的差異。

有網民則建議可另外考慮選擇坑口村及將軍澳村等鄰近市區的村屋。

西貢成日塞車？要預留較多交通時間？
而有網民就指西貢交通不便，出入都經常會遇上塞車嘅情況：「次次都塞車喎出入西貢」，不過有網民就為西貢講好說話，指西貢多數係假日先會塞車，並建議若住西貢可早出晚歸去避開塞車：「又唔係次次嘅，通常都係五六日啫，預咗五六日一係早啲出街/唔好咁早返屋企，一係留家，利申住緊」，亦有網民認為住喺西貢並唔差，只係需調節吓少少生活習慣及預多啲交通時間：「其實又唔係真係啲人講到咁差，係少少生活習慣要調節下(我以前都住市區)，車出車入係常態，就算唔係都的士/uber，巴士小巴有就有但多數都係俾你出返去駁鐵，所以交通時間點都要預多少少」。

有網民指出入西貢會經常遇上塞車的情況。

有網民則認為居住於西貢並不差，但需為交通預留較多的時間。

text/Jonathan
photo/HKET圖片庫

========
同場加映：
【蝸居睇樓團】2023兔年家居風水佈局 : 病位要點化解？文昌位屋企中間擺富貴竹？貼揮春禁忌！