港女尖沙咀食Omakase後確診 指廚師傳染要求餐廳道歉退款?餐廳咁回應獲網民大讚

文: 黃樂恩
2023.05.29

近年香港不少日式餐廳掀起Omakase熱潮,價錢雖然偏貴,但每間餐廳菜單各有特色賣點,深受不少港人喜愛!不過最近有網民分享,直指尖沙咀一間日本廚師發辦餐廳用餐環境不理想、餐點份量不大,而且負責她那枱的廚師「成晚喺度咳」,懷疑自己被廚師傳染才會確診新冠肺炎。網民事後要求餐廳道歉、全單退款,但遭到對方拒絕後決定在網上發文公審。該涉事餐廳其後亦有作出回應,並將二人對話內容公開,網民反應兩極,有興趣可以入內文睇睇啦!

日前(25日)有女網友在Facebook群組「香港Omakase おまかせ 關注組」發帖,指自己為朋友慶祝生日,特意相約對方到尖沙咀半島酒店「釧Kushiro」享用廚師發辦(Omakase)。當日到場她才發現餐廳樓底矮,「冇乜地方可以打卡,感覺好侷促」,之後又指與朋友每人叫了一份$2,500的套餐,不過她形容食物「冇乜特別」、份量又少,二人埋單連加一接近6千。

讓事主最不滿的是,負責她那枱的日本廚師「成晚喺度咳,咳得嚟仲要係有痰咳」,因此懷疑自己是被對方傳染了,才會在3日後確診新冠肺炎。事後,她向餐廳經理作出投訴、要求道歉以及全單退款,遭到餐廳拒絕後才決定在網上發文公審。

而涉事餐廳「釧Kushiro」於25日在同一群組發文回應,詳細解釋今次事件以及未能全數退回餐費原因。餐廳表示對於事主的不愉快用餐經歷感到抱歉,並在得知事主染疫後已全店消毒、要求全體員工進行快測,未有發現有任何確診個案。至於被指控不時咳嗽的山口師傅,餐廳則表示,「師傅有一定年紀,有時氣管敏感會出現幾聲咳嗽,因此一路以來他和全店員工都是帶着口罩去招呼客人」。另外,餐廳也特別回應事主「若果你哋唔退錢就上網寫衰你哋嘅做法」的言論,強調絕對不能夠認同和妥協這種惡意威脅。

其後餐廳更貼出與事主的對話記錄,從對話截圖可見,餐廳經理曾致電給事主,不過雙方無法達成共識和解,而事主更在信息中批評餐廳敷衍客人,「一句希望早日康復就算數」。當經理問她有何要求時,事主直言希望餐廳可以退回當晚費用,「最低限度你哋公司都應該要退返我嗰晚喺度食飯嘅錢畀(比)我囉,我咁樣病發睇醫生同埋要請病假,成個星期都返唔到工,呢啲賠償冇人可以賠到畀(比)我」。

當事主得知餐廳未能退回用餐費,又稱「你哋根本冇真正正視我嘅問題,完全冇諗過對我作出任何嘅合理賠償」、「我對你哋好失望」,並表明自己會在Facebook公審餐廳、向食環署投訴,其後更語帶威脅指,「你話你哋冇得開幾個星期呢條數金,定係我嗰晚食飯嗰條數金啲呢?」、「我而家病咗喺屋企好得閒呀,我有大把時間同你玩!」。

今次事件引起大批網民討論,網民反應兩極,有網民認同事主說法,「食過,真心性價比低,無驚喜到相都唔想影」、「事主餐廳衛生情況以及處理手法有問題」、「師傅響(在)我面前咳,我都會有疑惑同擔心」。但亦有部份網民認為根本是事主無理取鬧,「食完覺得唔抵就叫人退錢,唔退就上網寫衰人哋」,質疑她是故意找理由退款、實際上是想食霸王餐,「樓主點樣證明你Covid係喺人哋餐廳野返嚟?」、「出街 返工 坐車都有機會中,唔通又叫咳嗰條友賠償咩?」、「香港真係投訴之都,中covid 都可以賴,仲要人賠償」。

至於今次涉事餐廳就有不少網民大讚其處理手法,紛紛留言表示「今次無論員工同管理層都好快速咁處理件事,完全無冷落個客」、「做得好,絕對不能容忍這種客」、「呢舖我撐舖頭,不過換著我可能象徵式寄幾包Panadol比佢,預祝佢早日康復。」

來源:FB@香港Omakase おまかせ 關注組HKET

同場加映:【衝出嚟玩】葵盛11米高戶外歷奇樂園!22個刺激關卡/全港獨有蜥蝪牆/60米空中飛索

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【免費睇】《香港打卡蛋糕合集》↓

↓50間蛋糕店介紹!附真實食評/選購攻略等↓

↓50間蛋糕店介紹!附真實食評/選購攻略等↓