時下流行虛擬導賞遊，大家毋須到現場都可以隨時「親歷其境」。今次虛擬導賞遊係參觀區域供冷系統 ― 啟德區域供冷系統（北廠），機電工程署希望透過航拍、360度照片及多條影片，加埋吉祥物機智啤啤及智析寶寶作為導賞員，讓大家以全方位視角輕鬆了解高效節能嘅區域供冷系統嘅原理及運作。
啟德區域供冷系統（北廠）由2013年2月起陸續為啟德發展區內嘅公共設施及建築物供應中央空調用嘅冷凍水，直至2020年節省咗相當於6,000個家庭一年嘅用電量！為了讓廣大市民明白到節約能源對社會嘅好處，機電工程署於是推出全新嘅啟德區域供冷系統（北廠）虛擬導賞遊，令市民可以隨時「進入」廠房禁地包括製冷機房、供冷系統嘅控制中心，以及以360度零死角睇勻北廠各樓層及機電工程署總部用戶支站內嘅真實環境，從而對全港區域供冷系統增長知識。
360度零死角睇實景 不可錯過的8大重點
重點1：地面大堂睇片了解冷氣形成
導賞遊第一站係帶大家嚟到北廠嘅大堂，記得觀賞短片認識一下大堂嘅冷氣係點形成，從而對啟德區域供冷系統嘅原理有基本了解。此外，只要輕輕移動滑鼠即可以無阻擋地睇晒大堂全景。
機電工程署吉祥物機智啤啤(左)及智析寶寶(右)喺北廠大堂歡迎大家參加虛擬導賞遊。
短片內容以深入淺出方式介紹啟德區域供冷系統嘅原理。
重點2：走進供冷系統的核心
想進一步了解啟德區域供冷系統嘅運作，就要到地庫二層製冷機房。呢度係供冷系統嘅心臟地帶，存放超過10台製冷機組及各個核心機件。大家可以透過短片或圖片逐一認識包括製冷機組、冷凍水管、散熱水管、雪種回收裝置等核心機件，另外，亦有短片介紹及比較三種香港常用嘅製冷系統。大家置身虛擬導賞遊之中，機房每個角落都可以一覽無遺！
重點3：踏足禁地 ─ 控制中心
向來係「禁地」嘅控制中心，喺呢個虛擬導賞遊就破例開放畀大家入內參觀任睇唔嬲！咁難得嘅機會，你又點可以錯過一窺工作人員監察及控制整個啟德區域供冷系統嘅運作呢！
啟德區域供冷系統控制中心，監控北廠及南廠嘅供冷系統運作。
重點4：入房熄燈有嘢睇
想了解啟德區域供冷系統嘅歷史及發展，只需到北廠地庫二層閣樓資訊中心便可一目瞭然，呢度更展示全球邊個地方採用區域供冷系統添！除此之外，沿走廊直走到盡頭，入房後按照提示「熄燈」，就會「有嘢」睇！快啲體驗吓就知道答案。
資訊中心主要展示啟德區域供冷系統嘅歷史及發展。
呢間位於資訊中心盡頭嘅房間，入內按照提示「熄燈」，就會「有嘢」睇！
重點5：玩遊戲尋找智析寶寶
呢個虛擬導賞遊點止純粹參觀咁簡單，喺製冷機房控制中心內，設有「HIDE & SEEK找寶寶小遊戲」，俾大家於限時之內瓹窿瓹隙捕捉匿埋喺製冷機房入面嘅10個智析寶寶，過程中暢遊製冷機房每個角落，考你細心同眼力，3歲到80歲都啱玩！
重點6：機智啤啤考考你
智析寶寶除咗同大家玩捉謎藏，仲會與機智啤啤輪流出現喺北廠各樓層唔同位置，出題考考大家對啟德區域供冷系統嘅認識，好有挑戰性呢！
重點7：啟德區域供冷系統規劃模型
北廠入口大堂設有模型展區，展出包括啟德區域供冷系統機件等多個精美模型，其中關於供冷系統規劃嘅模型，展示區域供冷系統工程項目喺啟德發展區內嘅供冷覆蓋範圍、供冷站所在位置、海水冷卻及地下冷凍水喉管網絡嘅路徑。
啟德區域供冷系統嘅整體規劃，透過精美嘅模型讓大家一目瞭然。
重點8：機電工程署總部用戶支站
虛擬導賞遊最後一站嚟到機電工程署總部用戶支站，帶大家深入機房重地，全方位一睹為樓宇提供冷凍水作冷氣用途嘅熱交換器，及了解佢嘅運作原理。
熱交換器
區域供冷系統嘅未來發展
啟德區域供冷系統嘅成效有目共睹，政府將陸續於古洞北新發展區、洪水橋/ 厦村新發展區、東涌新市鎮擴展東部等地區設立區域供冷系統，為香港於2050年前實現碳中和而努力。
一撳開始「啟德區域供冷系統（北廠）」虛擬導賞遊：
中文版: https://www.emsd.gov.hk/energyland/KTDNP_DCSVR/tc/
English Version: https://www.emsd.gov.hk/energyland/KTDNP_DCSVR/en/
資料來源：機電工程署
」，
App內睇文同睇片可隨時捕捉U Fun彩蛋，
換領現金券及禮品！
↓【送禮】送友邦嘉年華門票連代幣400套！↓
↓【送禮】送友邦嘉年華門票連代幣400套！↓
【聖誕送禮🎄】《社群》x wwwtc mall聖誕驚喜4重賞！
↓送您人氣下午茶套餐及禮品套裝↓
