瞓覺都有學問！專家教你點樣瞓得好 一定要瞓夠8個鐘？半夜札醒發夢無問題、食褪黑素呃個腦？

============
【家居達人】瞓覺都有學問 專家教你點樣瞓得好 一定要夠8個鐘？半夜札醒發夢無問題、食褪黑素呃個腦？

============

Stephanie與先生Rick共同創辦Hush Home及Little Hushies，佢本身係一個獲專業認可資格嘅睡眠專家兼健康顧問，今次就由佢為大家解答關於睡眠嘅一切疑問！

Q1. 係咪一定要瞓夠 8 小時？
答︰其實睡眠專家多數會提倡至少瞓7.5至8小時，因為腦部要經過5-6個睡眠週期恢復，而每週期約90分鐘，因此 才會有 7.5 - 8小時為佳的說法。

Q2. 咁係咪無論幾夜瞓只要瞓夠 5-6 個週期都叫係瞓得夠呢？
答︰其實唔係㗎，最好就唔好太夜瞓覺。因為身體會按照你喺邊一個地方、太陽幾時出嚟、就會喺某一個時間開始產生你需要嘅荷爾蒙。當你夜瞓就會錯過吸收某一種荷爾蒙，身體會恢復得較慢。

Q3. 瞓得夠對身體有咩好處？
答︰瞓覺對人體十分重要，睡眠期間免疫力會提升、更加活躍，深層睡眠時腦部會清除當日的新陳代謝廢物，令第二朝起身更醒神。此外，腦部會處理白天收集的訊息，強化後再存儲在長期記憶中，所以小朋友或求學階段的青少年應盡量瞓得夠。

Q4. 點為之瞓得好？
答︰除咗瞓夠充足時間外，也有其他因素用來衡量睡眠質素，包括第二朝起身感覺好唔好、精唔精神？有無鼻鼾或睡眠窒息？夜晚會否成日扎醒起身？其實扎醒起身都不是大問題，但要睇吓需要幾多時間先瞓得返。

Q5. 發夢係好定唔好？
答︰其實發夢係 正常嘅，每個人都一定會發夢，只不過係你記唔記得。咁你記唔記得多數取決於你幾時起身，係咪啱啱發夢嗰段時間起咗身，咁你咪會記得你嘅夢。

Q6. 食褪黑素對入睡有無用？
答︰褪黑素嘅作用在於你個腦部同身體講要瞓覺喇！加上有其他不同因素影響，就會令你更加覺得有需要瞓覺。講返我哋身體自己產生嘅褪黑素先啦，其實我哋嘅飲食習慣同腸道健康會影響褪黑素嘅形成，所以一定要有均衡飲食習慣。而服用褪黑素其實有少少 Placebo Effect，會覺得好似我食咗呢個會瞓得好啲，其實都有幫助到瞓覺，加上食褪黑素都唔會對人體唔好嘅。

Q7. 同寵物一齊訓或者成床公仔會影響睡眠質素嗎？
答︰其實就唔建議同寵物一齊瞓嘅，因為佢哋夜晚大多數都會郁嚟郁去、跳上跳落，騷擾到你同佢嘅睡眠，唯有喺瞓覺前攬一攬跟住趕返佢咃落床啦。另外，成床公仔其實都可以嘅，只要你夠位郁動，因為我哋瞓覺時可能會有轉身嘅習慣。另外就係確保公仔唔會影響到呼吸道，可能會有塵蟎。特別如果你係對塵蟎環境比較敏感、呼吸道較弱嘅人就最好唔好喇，最好就定期清洗啦！

Text/Yuen
Photo/Ken、Pinterest