GUCCI手袋慘遭工人扔落洗衣機惹禍！洗爛最多賠$300事主勁嬲 網民反應兩極
名牌手袋弄髒後已讓人心痛不已，若清理不果更被洗爛，相信更加「揼心口」。最近有網民分享，老婆的GUCCI手袋竟遭工人姐姐扔落洗衣機，最後慘遭洗爛，令事主勁嬲，惟僅可要求工人姐姐賠最多$300，最後更將手袋贈予對方，引來網民熱議，但反應兩極！
GUCCI手袋神清潔大法？有男網民於Facebook群組發帖，分享老婆因1個失誤，痛失心愛的名牌手袋經歷。他表示，老婆本想叫家中的工人姐姐「抹下」個名牌GUCCI手袋，豈料姐姐竟然將手袋放落洗衣機內清洗，結果整個手袋「洗到爛咗」，形容老婆激嬲，並附上2張已慘遭「機洗」的手袋相片。
該款手袋為GUCCI GG canvas Tote Hand Bag，款式頗有些時日，價位大約$2400港元。從相片中可見，手袋為帆布材質，上面繡滿GUCCI標誌印花圖案，但經洗滌後部分圖案明顯脫線，手袋在無法還原的情況下，老婆最終將其贈予工人姐姐。惟眼見老婆痛失手袋，他亦留言詢問「係咪姐姐整爛嘢最多賠$300」？
事件引來一眾網民關注，有網民就直言事主明知手袋貴重，不應交給工人姐姐處理，「我自己貴嘢唔會叫工人幫我洗」、「貴重物品應該要同佢講埋點樣洗，唔好當d姐姐咁叻」、「唔會俾姐姐處理，整壞叫佢賠又唔係，唔叫佢賠妳又好無奈」；亦有人分享類似遭遇，「我試過將自己條LV頸巾放喺床尾，佢無端端自己攞咗我條LV去洗，洗完出嚟成條報銷，一句sorry mum…最慘我無叫佢去洗」，對事主深感同情。
至於工人姐姐賠償方面，部分名牌手袋雖然價值不菲，但不少網民不建議扣$300，直言「工人你扣佢三佰元，你扣了，你也無乜好日子過」、「佢同你一齊住，清楚你生活習慣多過你自己，要整你有N咁多種方法報復，貴重野唯有自己小心啲」，都有人認為即使收取賠償，僅得$300「要嚟唔知做咩」，不如日後不要讓他們處理貴重品，或者事前向對方說明清楚物件受到損壞的後果。
根據香港勞工處《僱傭條例》，如因傭工犯錯或疏忽而引致僱主的物品或財物受到損壞或遺失，僱主可按值扣除工資作賠償，但每次以$300元為限。此外，在這些情況下扣除的工資總額，亦不得超過傭工在該工資期所得工資的四分之一。
資料及圖片來源：FB@聘請工人姐姐關注組
港生活人氣本地熱話
【🎁免費送】HIZERO 輕量級F300潔地機！
↓簡單兩步登記贏清潔神隊友！↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
