傳銷騙局？港男親歷拆解5大傳銷新手法！參加聚會「洗腦」精神折磨5小時 事主：灌輸借錢價值觀

1. 邀請參加工作坊或聚會 拉攏認識新朋友

該男網民指出，透過工作上認識的朋友，始親身「體驗」傳銷活動手法，該友人表示自己營運社群（clubhouse），定期會舉辦活動予其他會員參加，例如香水、蠟燭、永生花等手工製作，「活動過程我feel到啲人係異常熱情，個個都喺度同我懶friend，會不斷附和我講嘅內容，俾（畀）你感覺呢度啲人好親切」。

點擊圖片放大

2. 熟絡後邀請參觀公司 塑造美好工作環境

兩人認識3個月期間，該友人帶他參加不同聚會，包括燒烤、落Club（夜店）、Party room（派對房）、做Spa等，「一開始我都冇乜嘢，咪當識吓新朋友，傾到佢哋feel到我冇戒心嗰陣，就叫去我佢哋公司度睇吓」。他應約跟隨前往位於九龍灣的公司食飯，友人隨即向他介紹公司設施包括健身室、遊戲室等，「塑造到公司環境好chill」。

點擊圖片放大

3. 飯後上樓聽傳銷講座  吹噓賺錢能力獲崇拜

直到第2次約食飯，友人再度邀請其前往公司餐廳用膳，及後便帶他去樓上聽講座，「聽talk之前啲傳銷X會係咁話講師有幾勁，有好多人都崇拜佢，而個講師我都有做過research，係傳銷高級老千嚟」。正式聽講座，他指出，講師會提及自己做銀行家年薪百萬，「講幾句嘢台下面嘅聽眾就會講啱啊，冇錯，好等等嘅附和說話」，惟未有太多實用資訊，「就係不斷咁吹噓自己之前賺幾多錢，之後我個friend仲要叫我mark低佢講嘅嘢」。

點擊圖片放大

4. 傳銷人員輪流展示支票 「洗腦」5小時氹落疊

傳銷講座時長約2小時，正當以為完結之際，他指出「個talk完咗仲要成班一齊反思學咗啲乜」，傳銷人員會再介紹新人予參加者認識，「佢哋每一個人講嘢都有格式，就係自己以前幾廢，入嚟做之後有幾成功」，說畢每人均會展示一張支票及個人身份證，以搏取信任。他續指：「由6點幾開始精神折磨我到11點幾，定力差少少都比佢哋氹到，好彩一早做曬research知道啲套路。」

點擊圖片放大

5. 邀請參加「現金流」桌遊+周末課程

他表示，傳銷人員稱將帶其大玩名為「Cash Flow（現金流）」的桌遊，並邀請他於周末參加該公司舉辦的課程，不過樓主認為，「想用board game形式灌輸借錢投資嘅價值觀」居多，因此以需工作為由拒絕參與。對於是次經歷，他直言世上沒有不勞而獲，「想警戒後生仔唔好搵快錢」，籲勿上當。

點擊圖片放大

層壓式推銷手法千變萬化，亦是部分人對「傳銷」抱負面評價的原因之一。該類公司參與者主要通過介紹他人加入而賺取佣金，即招攬新會員的入會費，透過一層壓一層賺取「人頭費」，但多數不提供任何產品或服務（或只屬幌子）。根據香港法例第355章《禁止層壓式推銷法條例》，任何人明知而推廣層壓式計劃，即屬犯罪。

資料及圖片來源：連登討論區、Unsplash