Gin Lee自爆患抑鬱冇錢睇醫生 回望最黑暗時期因1事愧對父母
Gin Lee繼2018年後再奪叱咤女歌手銀獎，去年簽約新公司破格推出唱跳歌《Dum Dum》，更一躍成為五台冠軍歌，成績斐然。回望過去，Gin經歷過黑暗時期，出現抑鬱症狀。最後成功撐過去，現在已可坦然面對：「無所謂，呢條路係自己要行嘅，呢個夢想係自己想追嘅。」
來港發展13年的Gin Lee李幸倪近日上節目分享自己初來香港的往事，當時她蝸居於北角小單位，冬涼夏熱，即使面積有二百多呎，兩房間隔，但由大門走睡房，不過三步距離。
Gin Lee憶述父母第一次來訪，媽媽看到她的居住環境，忍不住哭了出來，「佢哋攞咗兩個大篋，但望一望個地方，兩個人兩個篋係入唔到嚟，我阿媽就好心噏，喊咗。阿媽覺得唔慣，因為喺我哋家鄉每個人閒閒地都幾千呎，佢就會覺得原來咁大對比。」
回首過往，在北角這單位亦曾發生無奈又好笑的日常趣事。由於地方淺窄，Gin指母親每次煮飯都撞到周身瘀青，「你知煮飯嘅人又熱又盛，一轉身又撞跌嘢、一轉身又撞親，成件事好唔聚財，佢就覺得，唉，好煩。」
Gin又分享：「有一次我阿媽坐咗喺梳化睇電視，我見到阿爸冇位企又冇位坐，佢就入咗我擺衫嗰間好亂嘅房，佢擺咗張摺櫈喺入面飲咖啡，哈哈，個情景係好得意。我問佢：『你做乜喺裏面呀？』佢話：『我終於搵到個位坐啦。』哈哈。」
Gin又提到當時不了解香港潮濕的氣候，「我第一次見到啲牆係會滲水，啲衫晾咗三日都唔乾，我唔知點解，後尾fans話俾我知，『太濕啦你屋企！』佢哋好好，買咗部抽濕機俾我，我先知道原來香港係咁濕。」
儘管艱難，堅毅的Gin並沒有向父母求助，「我嚟香港一毫子都冇用過佢地嘅。」
孤身來港發展又一句廣東話也不會，Gin Lee咬牙睇電視自學，從早上10點《尋秦記》到《六點半新聞報道》，一步一腳印，現在連俗語亦掌握，Gin自言「我係半個香港人」。
然而在香港樂壇打拼，難免經歷低谷，Gin一度出現抑鬱症狀……Gin回想道：「完咗第一間公司，未簽第二間公司時，冇晒方向，又冇人脈，齋等，個過程好漫長。一天黑就喊，喊到天光，天黑開始驚，唔知點算好，我乜嘢都捉唔到，所有嘢都唔屬於我，我喺呢個地方做乜嘢？以為自己好有實力，但原來冇呀！好多呢種負面聲音。又冇鐖、又唔敢同人講。迫到自己個情緒去到臨界點。我係feel到自己如果再唔掹番自己返嚟，我可能返唔到轉頭。」
Gin淚目坦言想過向人求助：「不如你鼓起勇氣去搵人、去求救！嗰時我好驚，去問人都好驚，唔知道點傾」已經沒有退路的Gin最後靠自己走出來，問到她有否求醫，她無奈說：「嗰陣時我冇去睇醫生，我都冇錢睇醫生，睇醫生好貴，剩番嘅錢一係要嚟買機票、一係要嚟食飯、一係交租，幾時排到睇醫生呢？」
Gin自大學開始便已登台表演賺取學費、交租、給家用，對比初來港時的反差，Gin覺得愧對父母：「你咁大個女……自己嘅嘢都搞唔掂，又養唔到爸爸媽媽……我屋企唔係窮，但我覺我大個女啦，我唔想爸爸媽媽咁辛苦……我嗰陣時好嬲自己，係因為我過到嚟香港，以為所有嘢會更好，但係所有嘢係變得好差，搞唔掂自己嘅嘢、又養唔到爸爸媽媽，我係咁怪自己。」
慶幸的是最後Gin一一捱過，「我揀咗自己去撐，經歷過一個咁黑暗嘅時間，之後再遇到相似嘅問題，我唔係唔驚，但我有信心可以克服。」
來源：枉談
港生活人氣本地熱話
【🎁免費送】HIZERO 輕量級F300潔地機！
↓簡單兩步登記贏清潔神隊友！↓
↓【限時搶⚡】森源安睡足艾貼↓
↓吸走體內毒素｜改善血液循環 ↓
