垃圾徵費疑問：喺公眾垃圾桶丟飯盒都要用指定垃圾袋？家居垃圾無用指定袋，管理公司會否包底？

============
同場加映：
【家居達人】極速摺衫技巧 懶人必學、超慳空間

============
對於市民喺街上想棄置如紙巾、雪條棍、食物包裝或飯盒等少量隨身垃圾，係咪都需要用指定袋包裹，環境及生態局局長謝展寰表示，將少量街上產生嘅隨身垃圾放喺公眾垃圾桶，係唔需要用指定袋包裹。但市民唔應該濫用公眾垃圾桶嚟棄置家居垃圾。

將少量隨身垃圾放喺公眾垃圾桶，係唔需要用指定袋包裹，但謝展寰表示市民唔應該濫用公眾垃圾桶嚟棄置家居垃圾。

對於有物業管理公司擔心如果有住戶倒垃圾時，無用指定垃圾袋，物管公司就要「包底」，謝展寰就話屋苑如有住戶無用指定袋，下游垃圾收集商好有可能會拒絕接收，喺呢個情況下，管理公司可購買額外指定垃圾袋，將「違規垃圾」包好，先再交給垃圾收集商。強調呢個並非一般人心目中嘅「包底」概念，物管公司唔可用採用「包底」方式，免除個別住戶使用指定袋，形容做法屬「執手尾」而非「包底」。

屋苑如有住戶無用指定袋，管理公司可購買額外指定垃圾袋，將「違規垃圾」包好，先再交給垃圾收集商，謝展寰形容做法屬「執手尾」而非「包底」。

謝展寰表示本月底起，政府會逐步安排約3,000個市民經常購物嘅地方，如超市、便利店和藥房等認可地點，售賣指定垃圾袋及標籤。而唔少屋苑物管公司、居民組織及其他企業，已經計劃批量採購指定垃圾袋。截至本月16日，環保署已收到約6,300個申請，使用該署嘅網上平台批量採購指定袋。

環境及生態局局長謝展寰表示稍後政府將會到學校向學生推廣，亦和物管業和清潔服務承辦商緊密合作，商討落實工作指引及其他實際環境上執行時的細節。

text/Joyce
photo/HKET圖片庫