MIRROR丨花姐否認以雞嘲諷Frankie女友 被爆與AK拍拖沈殷怡五個大字回覆
快將36歲嘅MIRROR成員Frankie（陳瑞輝）同新歡Christy早前開始高調，令Christy嘅「歷史」都隨即被公諸於世，佢本人亂搞男女關係之外，Frankie更疑似因為佢同拍咗拖13年嘅女友分手。事件越爆越臭，AK同沈殷怡（Shirley）都被拖落水！
MIRROR經理人花姐日前Post story講「雞」，被指係暗寸Frankie女友，今日花姐親身單刀直入回應事件，佢解釋當日跟MIRROR成員到新蒲崗為拉闊綵排：「燒雞係嗰區嘅小食名物，個MIRROR隊員話好好食請我食，所以就買咗啦，但因為我對手濕疹，依家又唔可以派膠手套，咁就要赤條條用隻手食，我就同位隊員講以下說話：『我知道佢好食，但我真係處理唔到佢，我就咬兩啖算啦』。其實大家都未必會信，但係個story就咁樣寫咗出嚟。」花姐否認抽水，表示覺得Frankie都「咁大個人」，希望大家都畀個空間佢處理，又話事件太私人，自己冇過問，但就有關心Frankie心情：「佢好成熟，處理件事中，我諗佢需要啲時間去處理。」
而沈殷怡（Shirley）昨日被爆同AK係拖友，但就不願被捲入呢場七國咁亂嘅風波，透過經理人「唔關我哋事」回覆：「我哋唔回應任何唔關我哋事嘅嘢，辛苦哂。」
Frankie新歡Christy繼續被爆料，Christy「密友」持續以擠牙膏形式分享Christy往日喺社交平台發表嘅偉論！Christy日前被翻出佢周旋於AK（江𤒹生）同Frankie之間嘅對話，女方更「利用」AK令Frankie呷醋，雖然AK嘅言論平平無奇，但就畀佢講到係「狗公」一樣，認真無辜！21號再有截圖流出，Christy向Frankie詐嬌指自己被block，Frankie就回覆Christy「佢都唔想嘅」，原來，Frankie口中嘅「佢」正正係MIRROR嘅成員AK！Christy當時更老羞成怒大爆AK同沈殷怡（Shirley）係戀人關係，留言：「仲有呢個大陸阿嬋樣嘅三線奀星，逼ak block完我仲要特登黎睇我story宣示主權，收皮啦八婆，你條仔一直有偷食㗎onx！」
Christy早喺2021年已經post出《識碳一定係咁歎》嘅poster，節目由Frankie主持，播放日期為2021年12月至2022年，Christy留言：「今晚good show，call time 12:20，但係我哋6點幾先瞓。」暗示自己同皮皮「共度春宵」！另外又post出一張2022年1月同Frankie嘅對話，睇番對話內容當時明顯已經係熱戀中嘅情侶，而Frankie就係2022年5月先正式宣布同前度Hei分手。
今個月19號就有一張Christy嘅示威照，似乎以做第三者為榮！相中佢身穿褻衣，被一名男子從後攬住，留言：「其實我真係志在有個人陪吓我周圍去，我都覺得做佢（相中男子）條女真係好X陰公，佢哋仲要就嚟五周年，繼續若無其事咁慶祝扮恩愛，我玩厭之後一定會爆比佢條女知，再咁畀人呃落去真係好慘，即管睇下邊個識玩啲。」
Christy將IG經營得好妥貼，不時都分享性感美照，相中嘅佢樣靚身材好，撇除佢嘅言論，可以話係完美無瑕。然而，Christy原來曾經參加過ViuTV嘅選美節目，如果唔係「密友」爆料，相信2000年後都冇人認到，事關節目中嘅Christy同IG嘅Christy判若兩人，生佢出嚟嘅母親都未必認得到佢。
事件發酵咗兩日，Frankie終於出聲，聲明如下：
「最近一啲有關我私人生活嘅報導，為皮寶寶同支持我嘅你哋帶嚟困擾，我好抱歉。同時都想澄清，我係喺上一段感情結束後，先正式開始而家呢一段關係，希望大家唔好再作猜測。
另外，以前嘅我，唔了解己好睇嘅地方，喺舞台放鬆唔到，冇信心。
我開心大家最近睇到我嘅轉變，睇到我自信咗，開朗積極咗，打開咗自己，俾到更多好睇嘅自己大家睇。我知道呢啲注意絕對得來不易，我嘅轉變我感受到，我知道大家都感受到。」
原本網上都已經有唔少「皮寶寶」（Frankie粉絲）表示失望，但仍抱持觀望態度，而Frankie發聲明後反而令fans大為失望，指佢嘅聲明含糊其辭，更表示要「出坑」，Frankie人氣大受打擊！
港生活人氣本地熱話
【送禮🎁】送Esther Bunny春日好物🐰！
↓ 登記免費帶走可愛折疊傘 x 保溫杯 ↓
✨大派120盒艾草溫熱舒壓貼✨
↓ KO肩頸／腰背痛💆、改善手腳冰冷、舒緩疲勞！↓
