伍允龍逐個私訊覆粉絲「上晒頭」 私生飯守候5個通宵獲「求婚」合照
伍允龍（Philip）近日因為於電影《九龍城寨之圍城》中飾演「王九」一角人氣急升，工作更加大增，早前去到內地工作，有大批fans追隨，非常誇張。近日有一位fans將佢追星「成功」嘅相post到小紅書，但佢嘅追星行為就引起極大反應，中港網民仲非常兩極！
一名內地女網民於小紅書post出同伍允龍合照，相中內地女手拿一束粉紅色玫瑰，伍允龍揸機自拍，唔講仲以為係「求婚成功」，內地女留言指自己等咗五個通宵，仲同其他網民講自己等到暈暈哋，非常瘋狂：「殺青樂啦Phil！連熬五個通宵，有次只有我一個人在等，他每次出來都催我回去睡覺：『你仲未走啊？快啲瞓覺啦。』還學打呼聲音哼哼，被劇組staff認證的能熬，用普通話說了：『還有很多機會見面！』」
Post一出，有網民質疑佢「私生飯」行為影響到伍允龍生活，不過大多數內地網民都話好羨慕；又有人跳出解釋合照地點係伍允龍拍攝時使用嘅休息房車，係伍允龍自己安排每個人按順序上去合影，又指之前係工作人員們幫手合影，仲講笑話「遊客請進」，現場氣氛正常；而粉絲都好守秩序冇影響片場工作，拍攝過程中都時常有路人或者當地居民，地點並唔係私密。另外，仲有好多內地粉絲於Instagram私訊伍允龍，而伍允龍好多時都一一回覆同畀表情符號，有粉絲一旦不獲回覆，更加chur爆問「你是不是不愛我了」，似乎已經開始有不應該嘅幻想！
內地嘅「家人們」，唔少都好撐呢個行為，不過香港網民們就覺得好反感，更加擔心伍允龍會「好心做壞事」：「好人唔係咁做㗎！尤其佢做藝人，呢啲情況一定要學識點處理！覆DM唔係唔得，真係要睇吓DM內容，亦唔可以次次都回覆，畢竟有啲粉可能你畀得越多，需求就越踩線，佢就會越嚟越『諗多咗』。又或者，出個story話收倒晒大家嘅DM，唔能夠逐一回覆但收倒晒大家嘅愛諸如此類。 佢呢位癡粉嘅情況，如果對方只係講吓笑都仲好，如果對方真係諗偏咗，而仲要得倒佢親自回覆，咁只會令對方越諗越偏，後果其實可以好嚴重⋯⋯」
香港網民又擔心呢種無邊界感嘅回覆只會進一步影響伍允龍個人生活：「班家人們真係唔識咩叫尊重咩叫距離。留言已經見到好多家人們話羨慕佢，爭相效仿，伍允龍好唔得閒。」、「希望龍仔唔好因為情勒而好意變縱容，想同佢講錫fans唔係咁錫的，呢啲妥協等同縱容。真係好錫佢好愛佢嘅話，其實係會好驚距離太近煩親佢，又希望佢會有自己玩嘅時間。」
港生活人氣本地熱話
【請您睇戲】投選您心目中的金像獎影帝影后🫅🏻👸🏻
↓立即投票贏禮物！↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
