楊明重出江湖與徐榮李忠希出車 4年前炒車案入獄18日兼停牌

揸住車風馳電掣係唔少人嘅chill time，而楊明早幾年就因為犯罪而失去咗呢個自由，唔經唔覺，楊明嘅停牌期已過，今日佢就同位兄弟齊齊再去擁抱馬路。李忠希出post大曬合照並留言：「今朝約咗呢兩位兄弟遊車河🏍️🛵🏍️😊相當開心👍🏻開心係一種感覺😊係經歷加幾十年感情再加信任😊開心與你們一起同行🙏感恩我們還在。」李忠希仲tag埋徐榮，而楊明就因為冇Instagram嘅關係係冇被tag。

相中見到3人都笑得好開心，雖然烈日當空、熱到爆廠，但出車係無人可阻嘅「男人的浪漫」，相信佢哋都好享受！三人仲大曬佢哋嘅坐駕，楊明由平治私家車轉揸綿羊仔，要更加小心注意道路安全喇！楊明21年11月被判停牌兩年，如今已復牌近十個月，相信已做足準備重出江湖。

+11

+10

點擊圖片放大

楊明2020年8月在山頂馬己仙峽道發生交通意外，被控「拒絕提供血液樣本作酒精測試」、「不小心駕駛」及「車窗玻璃光度不足」3項罪名，「拒絕提供血液樣本作酒精測試」的罪名獲判不成立，初審時已承認其餘2罪，裁判官判他需要還押等候背景報告。之後辯方律師清洪指因當初向楊明提供法律意見時，令對方以為不會被還押及判監，指提供了不恰當的法律意見，故推翻2罪的認罪答辯，並不會再代表楊明，法庭批准推翻認罪。楊明之後多次上訴，希望得到非監禁形或懲罰，拖拉兩年，最終法官宣布駁回上訴，維持原判，即楊明需要即時監禁18天、罰停牌2年及判罰款2,000元。