正在閱讀
很想跟他瘋狂合照 去這些地方隨時捕獲野生發哥!

很想跟他瘋狂合照 去這些地方隨時捕獲野生發哥!

2015.01.22

文:仙人掌妹妹

圖:網上圖片 

網上個個都話喺街撞過「發哥」周潤發,小妹一次都未遇過非常不忿!為咗同發哥自拍,得到發哥招牌笑容呃like,小妹決定整理一下發哥經常出沒嘅地點,希望能夠捕獲野生發哥一個。

公共交通工具

雖然貴為影帝,發哥不時都會被網民影到佢搭港鐵、搭巴士,連太陽眼鏡都唔戴,唔怕被群眾認出。最近就有網民喺等巴士期間遇上類似發哥嘅身影,猶疑之際,發哥竟然上前自我介紹:「你好,我係周潤發」。小妹都好想聽吓發哥嘅自我介紹,然後回應:「你好,我係xxx」,同發哥做朋友啊……

 

機場

發哥不時都要去外地拍戲,從事機場地勤工作,或者經常旅行的話喺機場大堂就要特別留神啦!前幾日發哥出發前往北京宣傳新戲,check-in期間被機場人員同粉絲認出,毫無架子任影合照,而且仲有傾有講!旅行前撞到發哥,應該會特別開心!

 

九龍城街市

「明星街市」非九龍城街市莫屬,唔少藝人都鍾意去九龍城街市買餸,貪食材夠新鮮!發哥出名注重健康,經常親力親為落街市買餸揀靚料,連電視新聞都有訪問過佢對冰鮮雞嘅睇法,演戲厲害,又係住家好男人,睇嚟發哥喺師奶界都有相當高嘅地位!

 

又一城超級市場

除咗街市,小妹嘅家人朋友亦曾經喺又一城超級市場撞過發哥發嫂幾次,發哥見小朋友認得自己,會主動踎低合照握手,仲叫小朋友努力讀書;而發嫂亦全程笑容滿面,非常親民﹗

郊外

發哥鍾意行山人人都知,早前杜德偉就喺微博上寫:「感謝發哥的帶領,我今天征服了香港的大刀刃!」大刀刃究竟係邊?大刀刃位於林村郊野公園,登山難度屬一般,遠足新手都可以應付,由山頂上望下一望無際,就算見唔到發哥,都有靚景搭夠!據聞發哥都鍾意行鳳凰山蚺蛇尖八仙嶺,登山路線難度比較高,要行山遇發哥都要量力而為啊!原來好多人行山都撞過發哥,喺Instagram搜尋hashtag「#周潤發」,會發現好多行山人士同發哥嘅合照,小妹都要行多啲山至得!

 

九龍塘至尖沙咀

發哥前排為新戲減磅,每日由九龍塘寓所行路去尖沙咀,嫌行山太辛苦的話,你可以選擇喺九龍塘同尖沙咀間來來回回,撞唔到發哥都包你減肥成功!

想見「民間特首」一面,出街記得一眼關七,這些機會……,就係屬於你! 

 

相關連結