正在閱讀
點解「做緊成龍嗰陣就係夜晚」? 龍懷騫廣告之謎解開

點解「做緊成龍嗰陣就係夜晚」? 龍懷騫廣告之謎解開

2015.03.23

文: C編

「你的日子如何,你的力量也必如何」一個龍懷騫,一句說話,鼓勵咗幾多香港人你又知唔知?有時候呢,做人做到頹頹地,真係想拎返個廣告出黎聞下,吸下正能量,舒服返晒。

呢段獨白真係講得好好,幾句說話帶出龍懷騫樂天知命嘅積極態度。

但係,睇咗咁多年,有樣野真係大家都聽唔明,點解「做緊成龍嗰陣就係夜晚」先?

 

原文係咁講: 

「我呢就叫做龍懷騫,無電視嗰時呢就係日頭,就... 做緊成龍嗰陣時呢就係夜晚,有一樣嘢我比人哋叻嘅就係我唔怕黑,但我都同其他人一樣我係怕凍嘅。我都希望每一個人都識跳呢個開心舞囉。我淨係識呢啲架咋。」 

點解係成龍?電視成日播成龍架咩?唔通佢屋企臨瞓前都要睇成龍?《警察故事》無限Loop?

 

呢個謎,一直有好多人問,年年問年年答,但原來解釋有兩個,背後都有事實support嘅。追索返龍懷騫當年拍嗰個廣告正係2003年沙士時期,當年有兩個同「成龍」有關嘅節目:

 

一、成龍傳奇

 

話說2000~2005年有套以成龍做主角嘅美國卡通《成龍傳奇》,有線電視兒童台自2002年起逢星期一至五夜晚6點都會播,龍懷騫指嘅成龍有機會係卡通版成龍。

故事係講成龍做一個考古學家,同佢個姪女阿玉去考古集郵,搵12生肖襟章,點知集集都遇著惡人,即係好似Pokemon嗰啲呢,去到瓦努阿圖都會遇到火箭兵團然後群毆嗰種故仔呀。

 

反駁觀點:重點係龍懷騫屋企有無裝有線,同埋套卡通6點播出街,6點算唔算係夜晚呢? 

 

二、戇夫成龍

  

郭晉安當年全靠「阿旺」食糊做TVB一線小生。係囉,佢明明叫阿旺,不過套戲就叫《戇夫成龍》,播出日期係2002年12月30日至2003年1月24日(維基),好可能龍懷騫屋企嗰時日日睇,然後畀人請去拍廣告嘅時候仲記得套劇。

補充:套劇女主角係宣萱,咁套劇有無綁架情節呢?仲駛問?梗梗係有啦!第15集阿旺就畀人綁咗喇,連TVB官網都有文獻記錄。  

反駁觀點:咁都得?咁點解唔講阿旺要講成龍?

 

反正個廣告同成龍都無關,個message係想畀正能量大家。

係呢,你的日子如何呀?不如睇多次,吸收吓啲正能量先!

 

2012年仲有個新版廣告,睇完會打從心底笑一笑,多謝你呀龍懷騫!

 


相關連結