香港茶記hit爆東京　專訪「香港贊記茶餐廳」老闆：嘩你點搵到我哋架？

文: C

早兩個星期起，東京飯田橋開咗間茶餐廳....

你無睇錯係茶餐廳，叫「香港贊記茶餐廳」，由餐廳裝修、食物以至職員都好有「香港Style」，引來當地唔少東京居民討論。

日本出現咗一間香港地道嘢，仲要真係香港人開，香港人望住佢，感覺超時空又exotic，日本有好多「香港迷」(日本都有唔少愛港Fans架！)仲即刻衝過去又寫埋blog，高呼係正宗「香港味道！」呢道人氣勁到吹返黎香港，今日開始見唔少香港人facebook都有share。

我哋撥咗個長途電話去日本「香港贊記」，開頭係「摩斯摩時」，日本STAFF接聽，然後搵到老闆張先生，一句「喂」，廣東話呀，好親切！「嘩你點搵到我哋架？」我哋話見到日本blogger寫贊記，張老闆表示好開心。 

喺東京玩到Homesick嘅朋友，不妨過黎贊記睇吓，呢度百分百搬咗個茶記menu去，你睇，菠蘿包、蛋撻、奶茶、咸牛治、西多... 嘩，唔係見到日文都以為自己無啦啦返咗香港。

咁你可能會話，車，呢啲嘢香港條條街都有啦，有咩咁特別。但你如果有一日喺外地玩得耐，有無一刻覺得空虛覺得寂寞覺得凍？呢股湧出黎嘅寂寞，話唔定可以喺東京用個菠蘿包窒住先。

啲相係黎自一班好鍾意香港嘅日本blogger，佢哋食到勁hyper。

咁香港有無先？有，喺上環，不過唔係茶記 

咁「贊記」喺香港有無分店呢？張老闆話，原來佢仲有一間舖開喺上環，不過唔係叫「贊記」，而係叫做「果樹園」，由太太Yvonne打理，呢盤家族生意，裡應外合。

你睇個LOGO，同日本贊記MENU上個LOGO係一樣架！個LOGO係日本人設計嘅。 

我哋去到樂古道間「果樹園」(前名「祥子」)，開咗大半年，見到Yvonne同叔仔，原來果樹園唔係茶記，係一間果汁店... 唔係，好快就唔止係果汁店，佢哋諗住將果樹園再裝修打造一間日式甜品店，大約5月開幕。呢間果汁店，之前有日本好友睇舖，Yvonne話而家日本朋友己經返咗日本，仲過埋去贊記幫手。

呢個係叔仔，Yvonne話唔出鏡叫咗叔仔出黎哈哈。

喺香港就做日本甜品，喺日本就做香港茶記，港日友好美食邦交喎。 

石榴汁，老闆娘教大家，石榴日文係ZAKURO。幅圖都係日本朋友畫架。

點解叫贊記？點解做茶記？

「贊記」個「贊」字，原來係佢哋大仔個名。張先生自少喺日本留學，講得一口流利日文，而Yvonne家族生意又同日本公司有聯系，佢哋都好有日本人市場觸覺。Yvonne話，之所以有開茶記嘅想法，係發現原來日本人好鍾意中國料理，亦好鍾意嚟香港食嘢，咁不如開間港式餐廳啦。「開頭都驚日本人未必接受到，但係佢哋都好鍾意，啲蛋撻好好賣！」係呀，日本出嘅香港旅遊書好鍾意講蛋撻。

不過，其實今次並唔係佢哋第一次喺香港以外地方開茶記，以前已經喺中國開過，仲有其他飲食生意。 

贊記諗住做多陣就有新搞作，有好多IDEA，例如話搞香港宵夜式燒烤。「日本好多食肆都早收，想畀佢哋試下夜晚食港人食開嘅串燒。」咦，咪就係港式嘅「居酒屋」？我要燒菠蘿呀！

想知東京贊記同上環果樹園位置，下面link： 

東京「香港贊記茶餐廳」地址及介紹 >>按此<< (U Travel頁面)

香港上環「果樹園」地址及介紹 >>按此<< (HK港生活頁面)

：