愚人節|4月1日|一年一度玩味十足的愚人節來臨啦!不少品牌都趁今日出搞笑帖文逗大家一笑!各間連鎖餐飲如牛角、壽司郎,零售品牌IKEA、LEGO,就連航空公司、港鐵都「出招」!分別推出「和牛雪條」、「榴槤忘返香水」、「鐵路味shake shake粉」,甚至有小編惡搞到要食呢樣?即睇各品牌有幾爆笑!
愚人節8大品牌惡搞帖文
不少品牌都趁4月1日愚人節出搞笑帖文逗大家一笑!各間連鎖餐飲如牛角推出「和牛雪條」、零售品牌LEGO推出「樂春路」盒組,就連航空公司、港鐵都「出招」!分別踩過界開設「烘焙店」、推出「鐵路味shake shake粉」,甚至有IKEA小編惡搞到要食呢樣?即睇各大品牌有幾爆笑!
▼即睇以下各大品牌爆笑出招▼
1. 牛角推出和牛雪條
「極上神・仙和牛雪條」於牛角登場!集合神戶及仙台牛於一身的「神・仙和牛雪條」,於4月1日全線牛角Buffet雪糕櫃限定供應「神秘盲盒登場」,牛角更爆笑分享燒肉Tips,每面燒2分15秒,令和牛鮮味大爆發!牛角建議食客如果認真想食神戶牛及仙台牛,就要去牛角各分店啦!
2. 壽司郎推出天婦羅雪糕
壽司郎特別推出「南瓜天婦羅抹茶蕨餅芭菲」,將南瓜天婦羅放在牛奶味軟雪糕之上,再淋上甜醬油只售$27!壽司郎推出極具創意甜品,又甜又鹹又冰又熱,不過壽司郎表示「個芭菲已經畀小編食晒!」並祝各位愚人節快樂!不過如果大家對這款甜品有興趣,壽司郎更爆笑推薦大家,點一份南瓜天婦羅和牛奶味軟雪糕自己組裝!
3. KFC推出榴槤忘返香水
KFC推出4月1日限定的「榴槤忘返香水」,只要買D24榴槤葡撻禮盒裝,即送1支「榴槤忘返香水」!每間分店限量供應,送完即止,想要的食客就要快手啦!KFC小編更爆笑表示「唔好當我哋整蠱呀,呢單嘢堅過榴槤殼呀」。
4. 香港航空麵包店開幕
香港航空全新推出港航烘焙店於4月1日開幕!香港航空於中環包廠四街一號開設麵包店「港航烘焙」,並機上名物餐包帶到陸地市區,如港式菠蘿叉燒包、港式午餐肉包、紅豆包等均有售。而為慶祝新店開張,首41名顧客買包仲送機票!這個愚人節優惠真係激抵啊!港航發言人更表示,如果港航烘焙反應熱烈,更會考慮進一步開設「This This rice」飯店!
5. 港鐵推出鐵路味shake shake粉
港鐵公司今個愚人節踩過界推出薯條調味粉,4款全新口味的shake shake粉隆重登場,當中官方最推薦就是秘製鐵味粉,以及橙色包裝的高鐵粉、綠色包裝的綠鐵粉、淺藍包裝的機鐵粉!一系列shake shake粉都是期間限定,只限今日!
6. 昂坪人力纜車啟航
昂坪360正式宣布「昂坪人力纜車」於4月1日啟航啦!遊客於今日就可以乘坐,「昂坪人力纜車」試業期間每日4班,由東涌逸東邨為起點,經過昂坪棧道,來往昂坪市集同東涌。如果有興趣就記得在昂坪360的官網上預約啦!昂坪360更爆笑表示「相信今日推出「昂坪人力纜車」,可以為大家帶嚟精彩旅程」。
7. LEGO推出樂春路盒組
LEGO推出全新玩具革命性健康體驗「樂春路」盒組今天正式登場!「樂春路」盒組由142,025塊LEGO® Bricks鋪製而成,帶來更上一層樓的腳底按摩體驗!而且可以超快組裝,只需打開個盒,倒出顆粒就完成!LEGO爆笑指「任你點砌,一樣痛到甩肺!石春變樂高®,使唔使打定石膏?」
8. IKEA小編找數食呢樣
IKEA昨日發文稱「希望今次之後大家都知道IKEA入面是有洗手間的」,圖片顯示疑似有顧客在分店的示範單位內大便,現場遺留下一督啡色螺旋型物體。期後發出「小編聲明」指「仲有『雜物』我就食晒佢!」結果被網民要求找數。小編就在4月1日拍片找數,片中見「詩編」手握一陀咖啡色物體,上面似乎還附有些許黑色碎粒,未知是朱古力味、咖啡味、抑或是其他味道。片中人手震震地將手上的朱古力軟雪糕食掉一口!,
來源:Facebook@牛角日本燒肉專門店 Hong Kong Gyu-Kaku、Facebook@Sushiro HK 香港壽司郎、Instagram@KFCHK、Facebook@Hong Kong Airlines 香港航空 、Facebook@MTR、Facebook@昂坪360 Ngong Ping 360、Facebook@LEGO、Instagram@ikeahongkong