港人參加$3699湖南長沙旅行團！600人跟團投訴5大安排 附主辦方聲明回應
港人北上熱潮持續，除了深圳、廣州等鄰近地區，近期湖南長沙亦成為港人的旅遊熱點！早前有港女就趁著復活節長假期，付費$3699參加一個聲稱是「香港首創」的長沙旅行團，惟直至出發當日始知竟有600人同時參團，所有活動都齊上齊落，「做咩都要全部人一齊做」，全個行程相當趕急，指安排混亂如要跑住睇博物館、餐廳洗手間超負荷等，直言「又逼又趕，唔覺得開心」，因此發文投訴事件。主辦旅行社事後亦有發聲明作出回應。
$3699湖南長沙旅行團600人跟團 有港人投訴安排附旅行社回應
樓主表示，全個旅程合共4日，由西九龍站出發，行程首日前往指定地點集合，「去到見到有十幾團都係同一個旅行社，個下都有俾個人數嚇一嚇」，出發前已出現部分混亂，「團嘅人就開始聚曬係到，有啲人開始左穿右插想搵返自己嘅導遊，仲未計其他坐高鐵嘅人，推撞一定有，加上因為冇欄分開一條條隊，自由發揮」，直至上車導遊們才告知大家，原來全團合共有600人，又指該團是與當地政府合作，另外有攝影師隨團。中午全員成功抵達長沙，惟及後由用餐、去廁所、參觀景點等都陸續出現各種狀況，令樓主大感不滿！
港人投訴旅程情況
1. 廁所打蛇餅：3個廁格幾百人排隊
行程中令樓主崩潰的，莫過於「洗手間大排長龍」的問題。樓主分享，首日午餐的餐廳男女廁各得3個廁格，卻要應付數百人需求以致「打曬蛇餅」。有導遊見狀建議：「下個一個景點很近，去到先再去」，因此大批團友就忍耐至下個景點（博物館）才去。結果抵達博物館後，同樣情況重演，「啲人即刻要衝去洗手間，結果當然又要排隊」；次日煙花表演前用餐，餐廳職員見人龍太長，緊急開放「隱藏廁所」分流，才勉強緩解危機。但散場時，場館洗手間再次淪陷。
2. 跑住睇博物館：600人逼爆展廳
首日行程安排參觀「馬王堆漢墓博物館」，卻因600人同時湧入演變成「災難級」體驗。樓主表示，展廳本身燈光偏暗，空間狹窄，原設計僅容納少量遊客分批參觀，但當日十多團人同時起步，導致展區瞬間塞爆，她指出：「睇展品都有困難，基本上係人潮入面移動。」導賞員雖有講解，但由於人太多且講完即前行，基本上來不及了解。最誇張的是，當遇到重要文物時，後方人群卻不斷推擠，館內工作人員亦不斷催促向前行，「幾經辛苦，終於行到去終點，先聽到職員講，原來5點收館！我地4:15先到達，唔怪得佢要我地不停跑住咁行」。
3. 攝影師強制拍攝團友
旅行社安排隨團攝影師「紀錄行程」，卻演變成強制拍攝。樓主透露攝影師會突然衝過來拍照，連拒絕機會都沒有。有人不滿被攝入鏡，仍被要求舉公司提供的紙牌遮臉。次日晚飯時攝影師「又影相又拍片」拍攝團友進食畫面，另外在「瀏陽煙花」時未經同意「快閃一路行一路影，您未反應得切佢已經影完行左去」，令人大感不適。
4. 交通疏散混亂：煙花散場千人「逃亡」
行程重頭戲「瀏陽煙花」亦因人流管理失當，演變成混亂場面，樓主指出：「當入到場，就發現唔止600人，仲有其他團同本地人，驟眼望過去都有幾千人，入到場又冇工作人員支援，個個都係到搵緊位，又唔係同一方向行，就算導遊係前面帶住，都顧唔到咁多，情況係較為混亂同危險。」煙花表演全程60分鐘，大概有6至7幕頗震撼，「因為距離好近，放嘅煙花量都好多， 亦有無人機表演，不過因為次次放到最興奮嘅時候，佢就完了」，而且期間加插甚多「賣廣告」成份。
樓主續指，雖然600人有專區座位，前後都是香港人，但散場時「所有人都沖去出口，場館冇工作人員分流，保安又唔理啲人」，數千人同時湧向出口，導致推撞頻生。更糟的是接駁巴士位置不明，許多團友在黑暗中亂跑，甚至「見車就上」，生怕錯過回程旅遊巴。樓主表示：「由於大批人次疏散，導致路面塞車，原本20分鐘嘅車程變成40分鐘」，團友們疲憊不堪。
5. 硬銷轟炸疲勞：晚宴變「推銷大會」
今次旅行團行程第二晚設有「特色晚宴」，但被團友批評為「硬銷大會」。由旅行社高層輪流上台致詞，要求全場舉杯、拍手，其間不斷推銷其他旅行團，甚至播放宣傳片。樓主直言：「個個睇電話都唔想聽佢地講嘢，唔知仲以為自己去咗佢公司Annual dinner…焗聽佢地講嘢，又唔上菜。難得講完，要我地一齊舉杯，冇人理佢，佢見冇反應，攝影師影唔到相，就話好事成雙，要我地再舉杯。」終於上菜後，「您一路食，佢就播貴洲雲南養生團宣傳片，要您一路睇一路聽佢介紹。Annual dinner 秒變展銷會現場」，令人無語。
旅行社回應：未來會加強及完善流量管理
對於今次旅行團安排，主辦方日前（22日）亦透過社交專頁發聲明回應事件，稱當時已即時調整從而令整個旅程更加𣈱順，確保每位顧客有一個安心和舒適的旅程，未能達致某些顧客的期望，「我們深感抱歉及自我反思，並十分重視每一位客人的反饋」，又指將會在未來的活動中加強及完善流量管理，以確保行程更加流暢。
▼主辦方回應▼
不過，都有同樣聲稱參加今次旅行團的網民留言指出，整體行程體驗其實頗為理想，「今次旅程體驗錄色通道，感覺有貴賓服務，值得一讚」、「個團都唔錯，平時跟旅行團都係咁㗎啦」、「今次在大假出遊本想着咁多人參加實會好混亂，但出奇地比我想像中流暢，因為團友們行特別通道入閘已經省了不少時間」、「其實安排已經好順暢，出發個朝有特別通道入閘，省卻流程。比其他團已經好好多！大假期去旅行，係人都知道會好擠擁」。
▼原帖文▼
資料及圖片來源：Threads@siupo.siupo（授權轉載）、
港生活人氣本地熱話
【請您試用】敏感肌美白推薦面膜！
天然漢方溫和美白！位元堂珍珠美顏面膜粉～
↓【限時搶⚡】勁送Neoflam不鏽鋼食物保鮮盒↓
↓密封防漏及分隔式設計｜耐用又環保 ↓
