太上老君急急急口令大賽　158字終極急口令相信還是只有她才讀得到

文：Marcus

最近一名主播報導新聞嘅時候，開動咗Rapper Mode，將新沙士嘅學名「中東呼吸綜合症」讀成「中東呼吸中級綜合呼吸中東 呼 中吸呼吸中東呼吸綜合症」，之後有網民發現梁特同高永文局長都好Rap得，其中梁特會讀成「Er……中東Er……中 終合Er……呼Er……終合症 呼 終合嘅呼吸終合症」，小編試讀過，原來真係唔易，其實除咗呢個病名，世間上仲有好多急口令畀你挑戰，尤其係嗰啲就嚟選港姐嘅美女，想口齒伶俐就快啲練習下！

Lv 1 初級 (1-30隻字)
1.「入實驗室撳緊急制」

2. 「郵差叔叔送信純熟迅速送出」

3. 「痴線蜘蛛啲蜘蛛絲黐住支樹枝」

4. 「姨媽而家去宜家傢俬買而家岩用既宜家傢俬」

5. 「麥當娜約左麥當雄去麥當勞道個間麥當勞食麥皮撈當歸」

6. 「肯德龜同肯德雞去肯德基食肯德基最出名嘅巴辣香雞」

7. 「去街市買魚腸，見到姨丈，放低魚腸，問候姨丈，執番魚腸，拜拜姨丈」

8. 「雙層牛肉巨無霸， 醬汁洋蔥夾青瓜。 芝士蔬菜加芝麻， 人人食過笑哈哈」

小編都曾經憑呢句急口令攞到好多老麥公仔。

Lv 2 中級 (30-60字)
1. 「一蚊一隻龜，七蚊一隻雞，佢話龜貴過雞，我話雞貴過龜，咁究竟龜貴過雞定係雞貴過龜」

2. 「郭藹明過郭可盈，話郭可盈個袋型，郭可盈叫郭藹明過海改個袋型，改成郭可盈個袋個袋型」

3. 「財政司叫邰正宵做財政司，邰正宵叫財政司台證先，財政司話畀邰正宵知，要台證先要搞掂財政先」

4. 「床腳撞牆角，牆角撞床角，你話床角撞牆角定牆角撞床腳」

5. 「掘柑掘桔掘金桔，掘雞掘骨掘根骨。掘完根骨掘金桔，掘完鬼骨輪雞骨」

6. 「蘇格蘭場非工業用國際線路自動溶雪16Valve風油軑大包圍連鐳射彩色洗衣乾衣腐蝕性氣墊毛筆」

Lv 3 高級 (> 60字)
Big Boss 級:

「以上嘉賓係金管局同証監會嘅持牌人以上談及過嘅結構性產品並無抵押品如果發行人三個月無力償債或違法投資者可能無法收回部份或全部應收款項。結構性產品嘅價格可以急升可以急跌投資者或會蒙受投資嘅全盤損失，而過表現並非未來表現嘅指標，所以投資前呢請參讀上市公司嘅文件作出風險評估，同埋尋求專家嘅意見」

邊個話財經主播就冇人識？林芷彤BB之前就憑16秒講完 158 個字嘅神技爆紅網絡！