「咁辛苦為咩？」蛋黃哥出書講生活哲學，港人超啱睇！

日本Sanrio 13年搞咗個《食物角色選拔賽》，蛋黃哥擊敗咗「納豆貓」、日本神山「富士山布丁」等卡通奪得第二名，但由於佢實在太受歡迎，成功爬過「KIRIMI醬」頭於14年出度，之後點？咪就係紅到無論你上網、行街、食飯、睇戲、仲有去廁所(因為真係有廁紙產品)都會見到佢，剛剛上星期Sanrio公佈咗今年人物大賞嘅結果，蛋黃哥喺日本竟然排名第四，香港方面仲掛第二，相反老牌人物Hello Kitty 、My Melody 同 Little Twin Stars 三甲不入，究竟呢隻蛋黃哥有咩咁巴閉，可以風靡萬千少女？

今日介紹呢本書《懶懶der ~ 蛋黃哥的軟爛生活學》答到你，成本書用插畫形式，用蛋黃哥嘅角度演釋好多日常聽到嘅處世之道，例如「忍一時風平浪靜」、「退一步海闊天空」、「三分鐘熱度」，睇完之後要用一個字嚟形容蛋黃哥，就係「懶」，佢根本就係一個廢青，唔鍾意做嘢，唔鍾意競爭，最好一日到黑攤喺度唔使郁，但又有錢收，有飯食，對佢嚟講，最後都係畀人食，咁辛苦為咩？佢根本就係香港人內心嗰條蟲，我哋一日捱捱死，連個安穩嘅住所都冇，死咗仲可能冇位放骨灰，可以揀，有邊個唔想做蛋黃哥？現實中，要成為蛋黃哥真係冇咁易，不過當你喺生活上提唔起勁嘅時候睇下呢本書自High下，又的確幾自癒！

好啦，而家透露少少內容畀你哋啦！ 

書名：《懶懶der ~ 蛋黃哥的軟爛生活學》
作者：SANRIO
譯者：錢亞東
出版社：尖端出版
出版年份：2015年5月
售價 ：HK$83

提提你，蛋黃哥嚟緊喺朗豪坊有個展覽，想睇下哥的風彩就唔好錯過，詳情可接下Link：

http://hk.ulifestyle.com.hk/activity/detail.html?id=ABJGD1oxBwtZHwNr