雙料視帝重提初入行窮到燶唔夠錢食飯 憑《愛回家》終於出人頭地扭轉命運
現年38歲的張振朗(Owen)，曾參加2006年英皇新秀，並於2011年再次投考藝訓班而正式入行。14年來由跑龍套開始，經歷「翻版張智霖」及「地獄黑仔王」階段，再到今年捱出頭成出爐視帝。他最近專訪憶述初入行月入數千時幸得家人經濟支持的歲月外，亦披露2019年劇集接連被抽起及連環受傷黑仔期所得的領悟。
張振朗初出道曾經窮到燶
在屯門區成長的張振朗，感恩父母多年來支持他自由追夢。他坦承及至2015年主演《愛回家2》後才開始有穩定收入。未有穩定收入時，Owen直認要靠家人支持，「阿媽阿哥都有，阿媽幫得最多。一定有唔好意思，都廿到尾大個仔。阿媽係無限量支持我，但都有階段問我需唔需要考慮將來轉行，但當佢知道我好想繼續演戲呢個諗法，都係繼續無條件支持我。因為無人估到近五年我嘅轉變，所以都會擔心我，但起碼到今日，無令阿媽失望。」
唔敢加兩蚊轉凍飲
張振朗又指：「起居飲食係唔夠，好記得當時沈震軒帶我食日本拉麵，我一望餐牌，咁貴點算？或者佢睇穿我，話：『我請你啦！』又有一次同朱敏瀚一齊出去食嘢，又係見到菜單好貴，佢哋都係講咗一句『我請你啦！』係好記得呢啲畫面。當時連凍飲加兩蚊都唔夠膽，事關第二日食飯可能就係爭呢兩蚊。」
被封「地獄黑仔王」
六年前，Owen曾被封為「地獄黑仔王」。事因他接連五套主演劇臨播出街被抽起，拍劇亦多次受傷，當中甚至有兩次需即時送院急救。Owen難以忘記，當黑的他當時正在拍攝《反黑路人甲》，「嗰個階段，都會諗係個天覺得我唔啱呢行？好彩我樂觀，都會認為自己好彩！」
張振朗續稱：「會諗如果啲劇當時播，或者會畀人鬧到反艇喎？嗰兩次嚴重意外，如果我真係黑仔，有可能瓜咗喎？個cam跌落嚟嗰次，有可能毀容喎？好彩只係中膞頭！令我知道凡事往好方面睇，好嘢自然會埋嚟。」
港生活人氣娛樂新聞
【☀️Chill賞放大假】夏日大激賞🎁
⬇ 逾800份人氣禮品！贏走樂園門票／酒店住宿／自助餐 ⬇
【社群請睇騷】送太陽馬戲團KOOZA門票🤹♂️！
