正在閱讀
短命MD機你用過未? 隨身音樂播放器大回帶

短命MD機你用過未? 隨身音樂播放器大回帶

2015.07.13

作為一個潮人,就算你著晒所有潮服上身都係冇用,如果無返部隨身音樂播放器畀你聽下歌Un下,成個人都周身唔聚財,所以小編相信你哋一定用過下面其中一款機聽歌!


1.Cassette(卡式)帶機

Cassette帶都有超過50年歷史,不過真係喺香港流行都要到70、80年代,當時娛樂工業發達,多咗人聽歌,無論係歐西或粵語歌,當年好多人為咗聽新歌都會黐喺收音機旁,DJ一播歌就用Cassette帶機錄起佢,不過用呢隻機最煩就係怕食帶,斷帶要用膠紙駁返,放得耐啲磁粉脫落會無咗聲,至於Cassette機,Sony嘅Walkman系列當年應該都係橫行全市。

 

2.Discman
80年代出現咗CD呢種載體,逐步取代Cassette帶,隨住流行樂壇急興盛,好多人都會去買碟,然後用Discman聽,基本上Discman嚟講,都係Sony嘅天下,不過有個唔好處,就係音質抗震力較差,而且都幾大部,唔方便攜帶。

 

3.MD機
又係Sony嘅功勞,CD又大隻又無得編輯檔案,佢就研發咗Mini-Disc(MD)呢種新格式,最好玩莫過於要將CD裡面啲歌燒落MD碟度,自製你自己嘅歌List,諗返都用幾多時間,雖然90年代頭已經有MD機,不過真係多人用都要等到90年代未,2千年代頭,而且好快玩完唔興,畀MP3機取代,早兩年,Sony停產MD機同新零件,MD機就宣告死亡,但係好多孔明事後都慨嘆其實MD機音質係最好。

 

4.MP3機

MP3勝在下載速度快,而且經過壓縮,每首歌唔會佔太多位,不過早期MP3機一出都幾貴,512Mb可以過千蚊,最細可以去到64mb,計返都係入得十幾首歌,MP3機款式大眾化啲,有便有貴,細細部,拎出街幾方便,另外,MP3嘅出現帶起咗非法下載嘅風氣。

 

5.iPod

 

 

 

 

01年出產,用第一代iPod Classic嘅人根本就係另一個層次,iPod外型當然型棍好多,仲要配合iTunes,科技達人先會識,我哋呢啲窮學生有部MP3機仔已經好開心,之後就越出越多:iPod Mini、iPod Nano、 iPod Shuffle 、iPod Touch……MP3機就慢慢消失,不過都唔關蘋果事,智能電話嘅普及化令到大家都唔使另外拎部機出街聽歌,iPod都少咗好多人用啦,係咪?