「大隻Rocky」鄭健樂長文揭認愛先斬後奏 坦承單方面求愛致誤會：係我太大意

Rocky發文護航：係我太大意

今日（17日）凌晨，鄭健樂於社交平台發布長文，正式為這場風波拆解謎團。他坦言與Anita其實在上周才因健身堂第一次真正認識，僅相處兩次後，便對對方的勤力與進取感到極為欣賞。Rocky承認，更改Facebook狀態是他單方面的「驚喜」行為，動機是希望向Anita作出正式追求，並讓她睡醒時感受到其認真誠意，卻因不熟悉社交平台機制，在女方未確認前便令關係公開，導致事件變得戲劇化。

護花心切澄清無親暱行為：目前仍是好好朋友

對於令崔碧珈飽受輿論壓力，Rocky深感自責，並強調兩人認識僅一星期，絕無任何親密或親暱行為。他亦配合女方的說法，指現時關係為「好好好好朋友」，仍處於互相了解的階段。Rocky懇請大眾給予空間「愛護幼苗」，並承諾若將來真有好消息定會再作分享。

Rocky發長文交代真相：

「多謝大家近日對我同崔碧珈嘅戀情咁關心！Anita係一個好勤力認真工作同不停學習求進步嘅好女仔，呢個亦都係我非常欣賞同鍾意佢嘅原因。

喺呢到我想交代一下，我同Anita喺上個禮拜上健身堂先第一次真正見面同認識，同佢上咗兩次堂之後，上個禮拜五晚佢為咗答謝我，佢喺佢自己嘅社交網站post我哋嘅運動合照同埋tag咗我，並且落堂後請我食飯。食飯過程我哋有好好嘅交流，我覺得大家將來係可以發展落去嘅。

食完飯之後，我哋各自返咗自己屋企。當晚因為我想正式向Anita作出追求同埋俾個驚喜佢，所以係冇事先徵求佢同意之下，就喺自己私人Facebook更改咗同佢嘅戀愛關係。我成個動機其實係希望佢第二日喺屋企瞓醒時，睇到個Facebook通知之後，會感到開心同埋接受我嘅愛意，並且知道我對佢係非常非常認真！

但係因為自己玩社交網站唔叻，我以為私人嘅Facebook係唔會有其他人睇到，我亦以為更改status，必需對方確認先會show到出嚟。點知原來Anita未確認，個status都會show出嚟喺我個私人Facebook，變咗所有人都睇到。我作為藝人，實在呢件事係自己太大意，令大家作出不必要嘅揣測，變得戲劇化，越描越黑，令Anita飽受負面輿論同壓力，呢個絕對唔係我嘅原意！所以我要為呢件事負上責任，決定出嚟講返成個事實嘅經過。

事情被發酵到咁樣，而家我只可以講我哋嘅關係，係好好好好朋友，仍然處於互相了解當中，亦當然因為大家認識只有一星期，絕未有過任何親密和親暱行為。

希望大家俾啲空間我哋，愛護幼苗，如果將來有好消息先會再同大家分享，感謝！」

立即投選您心目中的第二屆年度男神女神👑

又嚟到年尾，係時候 wrap up 一下！