掘波、斬波、省中人！香港講波術語你識幾多？
文：廣東話資料館
講「踢波」，即係英文嘅（Football），國語又叫做「足球」，足球評述員，廣東人會好親切噉稱呼佢哋做「講波佬」。廣東人鐘意睇用粵語講波，一方面係因為粵語講波佬能夠營造一種輕鬆而舒服嘅傾談講笑氣氛；另一方面，碧咸、朗拿度呢啲叫法好聽過「貝克漢姆」、「羅納爾多」好多；但係更加主要嘅原因重係嗰啲抵死生鬼嘅港式足球術語。
廣東話用詞分工好明細同精巧，單單係（踢）波用到嘅腳部動作嘅術語，就有超過十個。
〔踢〕係指用腳向個波做出嘅一個動作，呢個動作就叫做踢。
〔射〕係將個波向某個明確嘅目標踢過去，通常都係指射門。
〔噍〕用力射門，係「射」嘅生動講法。
〔鏟〕通常係指救波時用腳阻止個波前進，或者係改變個波嘅前進方向。
〔掘〕喺場邊或者底線大力斬個波入禁區嘅動作，好似用鏟掘地嘅動作。
〔刮〕有意踢個波嘅底部，要令個波飛起。
〔兜〕有「刮」嘅意思，亦係指用腳背將個波踢出。
〔省〕係指個波打中某人或者以某個人為目標踢出，用嘅力度比較大。
〔搓〕用腳踩個波，令到個波前后左右來回轉動嚟避開對方嘅攔截。
〔擳〕輕軾力將個波彈俾自己隊友。
〔斬〕係用力將個波踢出去，通常係指龍門開波大腳開出。
〔拉〕係用腳將個波加旋轉踢出。
〔扯〕一般係指過頭嘅橫傳，進攻時大範圍轉移路線時用到。
〔梪〕個波到咗時，視乎需要，用腳輕輕將個波彈到一定嘅高度，用嚟避過對方嘅攔截或者係傳個波俾其他隊友。
踢波係七分腳三分頭，對於某啲頭叻過腳嘅球隊，例如係德國隊、中國隊（應該係講佢哋係對腳仲屎過個頭），可能五分腳五分頭添，所以頭部動作嘅術語都有唔少。
〔頂〕係指用個頭對個波做嘅動作，通常比較正路嘅頭錘動作都叫做〔頂〕。
〔批〕用一個唔同於個波來向嘅力頂波，令個波改變方向。而且〔批〕通常包含一個轉頭嘅動作，叫做〔獅子搖頭〕。
〔片〕同〔批〕相似，只係用一個更薄嘅力嚟〔批〕。
〔跣〕對飛嚟嘅波，用頭輕輕加力，令個波去到合適嘅位置。簡單嚟講就係用個頭嚟傳波。
〔鑿〕係〔頂〕嘅一種，指用額頭將個波頂向水平綫以下嘅方向。
本篇圖文獲作者廣東話資料館授權刊登，未經准許，請勿轉載！
廣東話資料館 facebook:https://www.facebook.com/廣東話資料館
港生活人氣本地熱話
【🎁免費送】HIZERO 輕量級F300潔地機！
↓簡單兩步登記贏清潔神隊友！↓
↓【限時搶⚡】又一城歡天雪地溜冰門票↓
↓假日消遣首選｜約埋親友享受滑冰體驗↓
