熱愛優質生活
首頁   \   港熱話   \   每個人,都想要一個好似阿強咁嘅朋友

每個人,都想要一個好似阿強咁嘅朋友

每個人,都想要一個好似阿強咁嘅朋友
2015.12.04

文:藍橘子

每個人,都想要一個好似阿強咁嘅朋友 

唔知有冇人同我一樣,每次聽男神黃子華Talk Show,都好期待一樣嘢…唔係除褲、唔係回水、亦唔係表演飲水…

而係,好期待子華會講佢朋友,阿強。

唔知點解,雖然阿強只係一個疑似虛構嘅人物,所發生嘅事亦有可能係虛構出黎,但子華每次講佢,我都覺得好開心。

或者咁講,我好想身邊有一個好似阿強咁嘅朋友。

 

當我哋步入社會,身邊所有嘢都教曉我哋,要好好收埋自己嘅真感情,嬲嘅時候唔可以發脾氣,應笑嘅時候就要笑,傷心時要堅強唔好喊。

當身邊有人成功,你唔可以羨慕或者妒忌佢,仲要由衷咁恭喜佢。因為咁先叫成熟…

之但係阿強身為一個男人,竟然會妒忌徐子淇。

人哋係女人黎啊阿強!咁又點?有邊個唔想生個仔就袋一億先?

 

我打成世工每日返公司執屎都搵唔到一千萬,個小朋友連屎都未識屙就有一千萬…公平咩?!

 

所以阿強係一個好忠於自己情感嘅人,佢單係聽到「咸濕」兩個字已經興奮,所以佢每日聽電台報天氣就要興奮好多次。

 

子華幾乎每年都講阿強,我亦確信阿強同子華係好好朋友。

我自己面書朋友數量有好多,莫講話熟到令我經常提起佢,甚至好多所謂朋友,要面書提我先記得佢生日。而子華至少每一次打風,都會叫阿強上佢屋企打麻將吖。就算香港有李氏力牆,大不了咪一齊捱眼訓返工囉!

 

成日聽人講,你想某個人失敗,就要不停去贊同佢講嘅嘢,讚賞佢每一件所做嘅事。當一個人認為自己做乜都啱,咁佢就註定會失敗。子華經常自嘲拍過一套票房慘不忍睹嘅電影《一蚊雞保鏢》,可想而知佢對呢件事非常執著。

 

但口臭嘅阿強唔單止無鼓勵佢,無講半句好說話,仲會串佢,叫子華改套戲名叫《一蚊雞棺材》,即係點解?抵死啊!一蚊有棺材訓,仲唔抵死啊?

 

雖然以上所形容嘅阿強,係一個賤到無倫嘅人。

阿強經常執著於小小事而煩惱。相反我哋煩惱緊嘅問題,阿強又可以一笑置之。

身邊有一個咁樣嘅朋友,煩惱應該會少好多,因為遇到有乜困難,見到思想荒謬嘅阿強,反而會覺得,點解我唔可以一笑置之?就算眼前擺一碟燒味壽司,都可以重新組合返一碟碟頭飯出黎啫~

 

好多人都話,其實阿強,就係心入面嘅另一個自己。其實只係太多人都唔肯將真正嘅自己表現出黎,只夠膽去羨慕阿強咁率真嘅性格。

 

雖然唔知呢個講法係啱定錯,

不過可以肯定,阿強唔係令你經常唔開心嘅二五仔,

而係一個永遠喺你身邊,為你帶來歡笑嘅好兄弟。

 

本篇圖文獲作者藍橘子授權刊登,未經准許,請勿轉載!

藍橘子Facebook https://www.facebook.com/BlueGodZi

 

內容評分
評語