黃埔街坊借港鐵站避大雨 寧願畀錢入閘免濕身？發文盼效仿美孚增免費通道！網民列3原因反對開放

打風落雨付$4穿站避雨 港人：有幾多街坊會俾錢行？

樓主在帖文中寫道：「唔知有幾多街坊會俾錢行呢條隧道」，並附上一張港鐵入閘口照片，拍攝地點推測為黃埔站。他表示，每逢下大雨時，都會支付最低車費入閘，由C、D出口前往A、B出口，更直言「太大雨，就算付費都要」。

他認為現時安排未能真正方便居民，因此發文詢問其他街坊意見，同時希望知道可透過甚麼渠道向港鐵反映問題：「點先可以反映到港鐵，可唔可以方便吓啲居民？黃埔啲風雨真唔係講笑。」

黃埔站東西面大堂不相通

翻查港鐵資料，觀塘綫延綫已於2016年10月23日正式通車，連接何文田站及黃埔站。受地理空間的限制，黃埔站採用單側式月台，大堂分為東、西兩部分，共設4個出入口。

延伸閱讀：黃埔站揀咩出口？4個出入口全面睇

黃埔站出入口分別位於民兆街、紅磡道、船景街及德安街，其中A、B出口位於西大堂，C、D出口則位於東大堂。由於兩個大堂之間並不相通，乘客抵達月台後需按目的地選擇出口方向，月台內亦設有出入口指示供乘客參考。

街坊認同做法 稱$4換乾爽相當划算

帖文引來街坊們共鳴，不少人坦言自己每逢打風落大雨，都會選擇付費穿過港鐵站避雨，「好大雨你就會想俾錢落去」、「$4唔洗濕身我覺得超值」；亦有人認為比起鞋襪被雨水浸濕，避免濕身濕腳，甚至因此著涼生病，$4根本微不足道，「比$4好過對鞋濕，鞋濕咗乾完都有浸味，而且唔使淋濕自己」、「4蚊有時換返唔使淋病，睇個醫生都200起」。

網民留言

• 好大雨你就會想俾錢落去
• $4唔洗濕身我覺得超值
• 比$4好過對鞋濕，鞋濕左乾完都有浸味，而且唔洗淋濕自己
• 凡係打大風落大雨，我都係咁俾錢㗎，唔使濕身濕腳嘛
• 4蚊有時換返唔使淋病，睇個醫生都200起

效仿美孚站做法？網民建議向港鐵反映

有網民則指出，港鐵出口之間未能自由互通其實並非黃埔站獨有情況，「好多站都係咁，出口互不相通，銅鑼灣、鰂魚涌都係」。不少人認為問題值得向港鐵反映，並以美孚站為例指出該站設有拍卡安排，方便市民免費穿越車站前往另一邊。

不過，亦有熟悉港鐵歷史的網民解釋，美孚站部分免費通道源於兩鐵合併前已存在的安排，具有特殊歷史背景，因此黃埔站能否仿效仍屬未知數，但普遍認為向港鐵表達意見無妨。

網友分析3大原因 黃埔站免費穿站不可行

另一方面，亦有不少網民持相反意見。有人認為雖然$4金額不大，但同站出入始終感覺「有啲貴」，更笑稱樓主願意付費穿站，證明相當「疊水」。部分網民則認為黃埔站與美孚站情況不同，指出美孚站屬轉線通道，而黃埔站涉及月台範圍，加上月台空間有限，不適合開放作公共行人通道，直言：「入閘就要付費啦！有問題？」、「你自己揀要方便自己嘅話，就比錢行」。

此外，有網民擔心一旦免費開放穿站安排，勢必吸引大量非乘客借道通行，不但增加車站擠塞情況，亦可能衍生逃票漏洞。亦有較激烈的留言認為，港鐵主要服務乘客，不應額外提供免費穿站服務，因此不認同樓主建議。

網民留言

+5

+4

點擊圖片放大

港鐵同站出入收費幾多？

事實上，港鐵一直設有原站出入及超時出閘附加費機制，以防止乘客在車站內長時間逗留、交收物品，或使用不符合資格的車票進出車站。

延伸閱讀：MTR港鐵罰款條例/價錢一文睇清！同站出入罰幾多？無有效車票、逾時出閘點計？　

根據港鐵資料，若乘客於20分鐘內在同一車站入閘及出閘，只需繳付最低成人單程車費$5，或最低特惠單程車費$3.5。如在同一車站停留超過20分鐘但少於150分鐘（即2.5小時），成人乘客須繳付$10附加費；小童、學生及使用車票二維碼的長者則須繳付$5，殘疾人士及長者則需繳付最低特惠單程車費$3.5。

至於超過150分鐘原站或另一站出入，在沒有合法授權或解釋下，乘客須繳付相等於當時最高成人單程車費$64或最高特惠單程車費$31.5的附加費。

+2

點擊圖片放大

來源：Facebook@黃埔人‧紅磡人‧土瓜灣人、港鐵