結業潮｜紅磡30年老字號茶餐廳月底結業！鮮茄燴意粉恐成絕響！街坊錯愕：咁好生意都要執

紅磡茶餐廳「華園美食」6月底拉閘結業

有港人於周二（16日）在Facebook群組「黃埔人‧紅磡人‧土瓜灣人」發文，表示發現餐廳門外貼出結業告示，宣布將於6月底正式結業。樓主引述東主透露，指近年生意未如理想，「無乜生意」成為結業主因。從店方張貼的公告可見，華園美食表示：「小店已在此為大家服務15年，唯租約期滿，本店將在本月底結業，盼有緣再會！」並感謝街坊多年來的支持。

街坊震驚不捨：連華園都要執？

消息一出，引起大批街坊及熟客留言表示驚訝。不少人對餐廳結業感到意外，紛紛留言表示：「連華園都執笠」、「唔係啩，呢間都執」。街坊更大讚華園美食一直保持高水準，認為是區內少數值得支持的地道茶餐廳，「成個區都連鎖餐廳，華園算係好食，人性化」、「華園美食好食呀！侍應又醒目」。亦有人感慨近年區內食肆接連結業，「果邊食肆係咁執，以前果邊好旺」、「又一個預製菜戰勝即煮嘅例子，悲哀」。

網民留言

+6

+5

點擊圖片放大

網民分析結業原因 午市旺晚市冷清成致命傷

不少熟客認為「紅磡黃埔最好食嘅茶餐廳就係佢」，甚至有人覺得「黃埔最好食嘅茶記，咁好生意都要執」、「成日想幫襯但無位」。不過，亦有街坊指出餐廳雖然午市經常滿座，但晚市情況截然不同，表示「夜晚係少人嘅」，更稱「依家成個紅磡同黃埔一到晚上8點，少左好多人，係壽司郎最多人」。

網民留言

• 吓，佢晏晝好多人個喎，都冇乜生意？
• 依家成個紅磡同黃埔一到8點，少左好多人，係壽司郎最多人
• 成日想幫襯但無位，咁都要執
• 黃埔最好食嘅茶記，咁好生意都要執
• 紅磡結業潮
• 紅磡，黃埔今年收了很多老店舖！
• 黃埔乜都執笠

招牌鮮茄燴意粉恐成絕響

對於餐廳即將結業，不少熟客最不捨店內多款招牌菜式，特別是鮮茄燴意粉恐成絕響。有食客直呼：「我個燴意冇啦」、「冇雞髀意粉食」。除了燴意粉外，亦有人點名懷念其他人氣菜式，「以後冇得食鯪魚球米線」、「佢個雜扒飯份量又夠味道又好」。

據街坊透露，連同上一手老闆經營時期計算，華園美食至今已陪伴區內居民逾30年，承載不少人的成長回憶。過去華園美食曾因推出$29抗疫餐，獲不少網民大讚是「良心老闆」。如今隨着餐廳宣布結業，這間陪伴紅磡及黃埔街坊多年的老字號即將拉下鐵閘，也令不少食客感到惋惜。

來源：Facebook@黃埔人‧紅磡人‧土瓜灣人、Threads