外傭加薪｜外傭工會倡加薪$6670兼增膳食津貼！港人質疑3大說法：包食包住仲要加？

外傭工會促加薪至$6,670 膳食津貼增逾一倍

上周日（5日），香港亞洲家務工工會聯會（FADWU）出席勞工處勞工諮詢會，就外傭最低工資及膳食津貼提出多項建議，包括將最低工資提高至$6,670，以及將膳食津貼由現時每月$1,236增逾一倍至$2,770。

翻查資料，政府去年9月30日起將外傭最低許可工資上調2.2%，由每月$4,990增至$5,100。不過，工會認為現時薪酬未能追上通脹及生活成本，促請政府檢討水平。

外傭高舉「加人工」標語 餐盒展示「$13.3一餐」

當日有不少外傭高舉「$6,670加人工」、「$2,770食物費」等標語，呼籲政府調高工資及膳食津貼。另有外傭手持印有「My $13.3 Meal」的餐盒，展示現時膳食津貼折算每餐僅約$13.3的情況，可見餐盒內只有營多撈麵配雞蛋、幾片白麵包、白飯配青菜及梳打麵配雞蛋等簡單食物，藉此反映現行津貼難以負擔基本膳食。

工會：印傭每日僅獲6湯匙白飯

工會亦分享個案，指早前接觸一名印尼籍外傭，每日僅獲僱主提供6湯匙白飯，長期未能獲得足夠營養。工會指出，現行法例只規定僱主提供免費膳食或每月$1,236膳食津貼，但未有清楚界定膳食質素，認為政府應盡快修訂標準僱傭合約，將「一日三餐合適膳食」納入具法律效力的條文，同時提高膳食津貼至$2,770，保障外傭基本飲食需要。

港人怒轟：經濟差仲加咁多？

事件引起大批港人熱烈討論，不少人對工會提出的加薪及增加膳食津貼建議表示難以理解，認為現時經濟環境欠佳，不少市民同樣面對生活壓力，「經濟不景氣，公務員都係加2%，佢哋都幾大咬」、「請女傭貼錢買難受，僱主身心疲累」、「依家成個外傭條例對僱主根本就唔公平」。

亦有網民認為，外傭已享有包食包住以及醫療、機票等福利，質疑再大幅加薪是否合理，「包食包住包機票包醫療，請問通脹關你哋咩事呢？」、「僱主自己出去打工，有邊個老闆包食包住包埋水電煤？」更有人形容僱主負擔沉重，直言「咁嘅水魚，世間難求」、「窮過外傭， 情難以堪」、「講到咁慘，叫佢哋去中東返工呀嘛，使乜嚟香港啫」。

網民留言

+10

+9

點擊圖片放大

港人憑3點質疑工會說法誇大

工會分享的「每日僅獲6湯匙白飯」個案，以及以「My $13.3 Meal」餐盒展示膳食情況，同樣引起不少港人質疑，認為有關內容未能反映實際情況。

疑點1｜「6湯匙白飯」個案

不少網民質疑工會分享的個案是否具代表性，「你哋Fact Check咗未？6湯匙飯都講得出？扮慘唔係咁扮」、「6湯匙飯都可以食到咁，僱主提供嗰隻湯匙都幾巨大」、「你睇吓張相？邊個營養不良？營養過剩就差唔多」。

疑點2｜「$13.3一餐」成本

至於工會展示的餐盒，同樣成為討論焦點。有港人質疑餐盒內只有一包印尼撈麵、一隻雞蛋等簡單食物，成本未必如工會所指，「印尼撈麵+1隻蛋=$13.3 ? 想知條數點計？」、「一包公仔麵使鬼咁貴咩」、「$13.3淨係得一個撈麵+1隻蛋，呃香港人唔識買餸呀？」

疑點3｜外傭打扮

另外，亦有網民將焦點放在外傭的打扮，認為與工會希望呈現的形象有所落差，紛紛留言：「影相個姐姐仲戴戒指頸鏈、化晒妝，咁有心情扮靚仲話冇錢食飯？」、「班演員全部穿金戴銀，下次認真啲啦」、「做戲都做好啲啦，著到身光頸靚咁」、「笑死，個個穿金戴銀揸住個麵。」

僱主權益缺保障？港人提出4項建議

部分網民則認為，政府在檢討外傭待遇的同時，亦應一併檢視現行聘用制度，保障僱主權益。更有港人留言表示「我地僱主都有要求」，認為政府應同步檢討現行外傭制度，平衡僱主及外傭雙方權益，包括設立3個月試用期、若工人未能通過試用期，須由中介免費安排更換工人或退款、工人未完約辭職，須自行承擔回程機票費用等。

來源：香港亞洲家務工工會聯會、Facebook@聘請工人姐姐關注組、東涌各區環境關注