熱愛優質生活

香港女生棄當高薪護士,台灣追夢教整蛋糕 原因得一個「諗到就去做」

香港女生棄當高薪護士,闖台灣追夢開烘焙工作室
2015.12.31

文:cc

 

講起淡水,大多會想起情人橋、漁人碼頭、淡水老街這些景點;一個於香港土生土長的女生,卻追夢追到去台灣,在這著名的旅遊區中開設一間蛋糕店+工作室,日日狂整餅。

放棄當護士的高薪,用掉大部分積蓄於一個陌生的地方重頭開始,做自己堅持的事,講就易,要落實的話小編都淆淆地。香港女生KaKa如此「烈女」,原因只是…?

香港女生棄當高薪護士,闖台灣追夢開烘焙工作室位於淡水的工作室,連鋪頭招牌都夢幻過人

 

由癌症病房謢士,變身整蛋糕的白天使

Ka:「我信星座架,可能因係我係人馬座,諗到就去做,無顧慮咁多。」

KaKa開設工作室前,當過謢士幾年,工作範圍還要是令人最無奈的「癌症病房」;自己是個愛自由的人,身邊的病人卻無得選擇,每日面對「死亡」,讓KaKa更有勇氣去追夢,由一個白衣天使,變身成穿起白色廚師服的專業烘焙師。

劇情發展好老套,但現實就是這樣。

香港女生棄當高薪護士,闖台灣追夢開烘焙工作室KaKa的作品之一,成件藝術品咁

 

Ka:「2011年去過台灣之後,我當時諗,做滿3年,儲夠錢攞埋護士約滿酬金,一定要辭職去台灣學整蛋糕。」

這隻「想做就去做」的人馬,實際上是隻亂衝之餘,又有計劃的人馬。

 

人馬座也有陰暗面,初到台灣就遇上奸商

星座這回事,有時真的幾準,KaKa的性格跟人馬座的特徵有9成相似,「愛自由、樂觀、想做就做」。不過,再開心的人,都有軟弱的時候…

Ka:「開鋪頭幾個月好唔慣,每日都一腳踢十幾個鐘,入貨、執貨、準備材料教班、洗碗、洗廁所,全部都自己做,洗到有主婦手,夜晚就喱埋喊。」

香港女生棄當高薪護士,闖台灣追夢開烘焙工作室

幸好鄰居都好好人,對這個香港女生照顧有加

 

KaKa成長於小康之家,家人開茶餐廳,細個都要落鋪頭幫手,自問不是「大食懶港女」

Ka: 「同屋企人住,家務都有工人姐姐和家人分擔,去到台灣所有野都要自己做,就知大鑊。」

辛苦可以熬得過,但面對着一盤盤洗不完又一定要洗的一碗,那種無助、寂寞的感覺才是最可怕

香港女生棄當高薪護士,闖台灣追夢開烘焙工作室日日都要洗這麼多碗,頭都痕

 

雖然做謢士時儲落一桶數目相當可觀的金,「慳得就慳」始終是KaKa的宗旨;揀鋪、裝潢都盡量慳,親力親為。家人都笑她蠢,於淡水(近民居那邊)開工作室,她倒覺得前鋪後居慳番筆幾好;去二手市場買雪櫃,以為台灣人做生意都會老老實實,結果呢…

Ka:「老闆話要Check的話要搬去另一個地方好麻煩,運咗番去有問題先再搵佢。」

相信不少讀者跟小編一樣,第一個反應就是,「擺明呃你啦咁都信」,偏偏Kaka就是天真的信了。

Ka:「都唔知點解嗰時咁天真,自己又唔識台語好難溝通,反正就係信咗、蠢咗,當比錢買教訓。」「為咗個雪櫃,我請水電師傅鋪過電線,花咗大筆錢,終於可以開着個雪櫃喇,雪櫃個摩打嘈到根本用唔到。」

香港女生棄當高薪護士,闖台灣追夢開烘焙工作室 

香港女生棄當高薪護士,闖台灣追夢開烘焙工作室

兼做裝潢師傅,難怪對工作室咁有感情

編:「咁點算?換過部?」

Ka:「老闆堅持無得換,最後我嬲到忍唔住當場喊。」

按老土的電視劇情節, 再衰的老闆,都會被小女生的眼淚攻陷,然後話:「怕咗你啦,換比你。」

 

Sorry,諗多咗。

Ka:「佢完全無反應,勁冷淡咁講咗句『小姐,警察局就在那邊』,兇我睇我敢唔敢報警,仲提議我將個雪櫃放喺鋪頭外面,一定唔會嘈!」

香港女生棄當高薪護士,闖台灣追夢開烘焙工作室現在每天陪着Kaka就是這隻領養回來的小貓—MK仔,或許牠是全台灣唯一一隻金毛MK仔

 

香港人看台灣人,「還可以」究竟是好,還是不好?

編:「喺台灣生活一年,你覺得你同台灣人、文化融合未?作為一個土生土長嘅香港人,你點睇台灣人呢?」

Ka:「好有禮貌,好包容,同大家去旅行時睇到嘅差唔多。正正係因為佢地好有禮貌,唔鍾意都只會講『還可以』,有時真係會憫。」

有拖拍的你應該好明白,問另一半食西餐好無,「還可以」、「是但啦」,那究竟是好還是不好,喜歡還是不喜歡;問多次只會聽到「無所謂啦」,猜錯又怕對方失望,率直也有率直的好。  

香港女生棄當高薪護士,闖台灣追夢開烘焙工作室台灣的同學仔「老師」前,「老師」後,KaKa都要習慣一下

  

Ka:「仲有一樣,有啲位,台灣人好執着、好老土。任何重要文件,都要有個印章,如果唔係就作廢,有當時人簽名都無用。」

編:「咁我帶你個印章去開戶口都得?」

Ka:「得,而且印章周街都有得整,5-10分鐘就整到一個,要整個一模一樣嘅話都無咁易。」

 

「當地人」帶路,介紹可能是全台灣最美單車路線、最好食的豆腐花

去台灣旅遊,我們好多時都會將行程安排得密一密,上山又下海,先登山看日出,再出海賞鯨、浮潛,這些公式般的「旅遊活動」,KaKa都很少接觸,應該說是無時間接觸。

Ka:「不過我到台灣後鍾意咗踩單車,上次就自己一個由淡水踩到新店,再番番淡水,『台北河濱自行車道』超好踩,沿途仲會經過彩色小屋!」

香港女生棄當高薪護士,闖台灣追夢開烘焙工作室

想去台灣單車環島遊的朋友,可沿這路線預習一下。

 

編:「淡水到新店,即係有幾遠?」

去過台灣一兩次的你,應該有印象那個日日都對着的捷運路網圖的中間,有一條長長的紅色線(淡水線)與綠色線(新店線)連接起來,淡水與新店,就是一個頭一個尾。

即是幾長?

大約50公里,未計來回。(視乎有無踩入小路)

仍然無概念?

即是來回大圍至大尾篤兩次有多。

果然是人馬座,踩單車都踩得奔放過人,差點再被Kaka的「斯文樣」欺騙倒。小編踩一轉「大圍-大尾篤-大圍」,都嗌救命,係咪太虧?

 

編:「台灣美食方面,有無好介紹,係咪日日都去夜市開飯?」

Ka:「其實我認識嘅台灣朋友,都唔係經常去夜市;如果要揀一間夜市小店,我會推介大家去石牌站一間古早味豆花,好多台灣人都鍾意去,又平又好食!」

(編按:KaKa記不起豆花店的名字,只記得招牌有古早味三個字;翻查資料,應該是「水龜伯古早味」)

 

如果可以重新選擇,你會不會放棄謢士這份穩定的工作?會不會鼓勵其他人追夢?

Ka:「一定會。」

肯定到令小編幻想到卡通片中,綁着必勝頭巾的主角。

Ka:「年紀愈大,負擔就愈大,要考慮嘅野就愈多。好幸運屋企人而家仲健健康康,我唔需要長時間留喺佢地身邊,照顧佢地。」

香港女生棄當高薪護士,闖台灣追夢開烘焙工作室KaKa特別把鋪頭的Cupcake帶回港,讓疼愛她的婆婆看看

講到目前最遺憾的事,就是錯過了不少好友的大日子,上次見面時朋友A還未結婚,再見面時仔都生埋。

香港女生棄當高薪護士,闖台灣追夢開烘焙工作室難得回港,特別為新婚的朋友準備了wedding cookies

 

編:「時不時都聽到香港人話去台灣開cafe,你點睇?」

Ka:「成街都係cafe,睇住一間執完到另一間,除非你覺得自己間cafe好有創意,如果唔係不如做其他野,台灣人接受新事物程度幾高。」

 

這隻無時停的人馬難得於12月回港開班,小編也抓緊機會偷師學做了一隻糖皮小狗,不錯吧!

香港女生棄當高薪護士,闖台灣追夢開烘焙工作室

 

訪問過後的幾天,KaKa又獨自走到匈牙利進修了,用「束縛不來如人馬座」來形容她,適合不過。

2016年1月1日,又到講夢想的時候,上年的你是本着「無驚無險又過一日」,還是為理想而努力呢?新一年,不如做一隻不安於現狀的人馬。

 

Kaka的烘焙教室:白天使.手作烘焙

地址:淡水區學府路51巷6弄2號

內容評分
評語