女神配對計劃2｜CEO Tony驚青腳軟連累女神落水 水上肉搏變爆笑綜藝網民激讚：搞笑擔當

水上大混戰驚現「全場最弱」 Tony未出發先腳軟 

今集重頭戲「水上騎膊馬」進入終極三人對決，由Yvette、Kanis及Roxanne爭奪冠軍。其中，身形瘦削兼「完全唔識游水」的Tony與Kanis拍檔出戰，未落水已相當憂心，自嘲：「叫我孭幾十Kilo再做深蹲係有啲困擾。」不出所料，比賽一開始Tony已經頂唔住，Kanis事後更笑爆爆大爆料：「我一上去就Feel到佢腳震！」最終Tony因腳軟無力支撐，令Kanis「不戰而敗」直接跌落水中，場面極度搞笑。

網民激讚自帶綜藝感：為愛勇氣可嘉！ 

雖然Tony在遊戲環節中表現「論論盡盡」，但這種毫無偶像包袱、全力以赴的真實反應，反而大獲網民歡心。大批觀眾在討論區留言讚爆Tony是節目的「搞笑擔當」：「笑到我流眼淚」、「佢啲真性情真係幾搞笑」、「一向都覺得佢好有喜感」。更有網民欣賞他明知自己體能輸蝕，依然願意為心儀對象頂硬上的精神，直指他「有勇氣同埋願意為鍾意嘅人付出」，人氣不跌反升！

 Yvette成終極贏家 行使特權換走Kyle引發暗湧 

另一邊廂，水上混戰最終由Yvette與拍檔Ice勝出。Yvette除了獲得與同隊Oswald單獨撐枱腳的福利外，更贏得「換人特權」。她隨即將原本在Roxanne組的Kyle調入自己組別，此舉不但令Kyle大感意外，更令一直默默守護的Oswald倍感不是味兒，為接下來錯綜複雜的三角關係埋下伏線，令節目追看性直線飆升！