女神配對計劃2｜冷氣男神Oscar被斥渣男直認唔開心！親揭突然轉軚揀何沛珈真正原因

被斥渣男直認不開心 Oscar 親揭轉選 Roxanne 背後完整心路歷程

談到最新一集，最大爭議劇情莫過於原本偏向俞可程 Kanis 的方智弘 Oscar，突然轉投何沛珈 Roxanne，遭批評渣男！面對坊間爭議，Oscar 坦言有少許不開心，但仍應阿Bob 要求，大方公開選擇時的心路歷程：「我覺得我係需要了解一個人深咗，先可以做一個決定」、「呢個（轉選擇）係我跟從自己內心，我知道好多人一開頭對我揀 Kanis 好支持，我都收到好多 DM 叫我千祈唔好轉人，但我覺得最終我都係要忠於自己意願，咁先係真正嘅我。」

阿Bob 力撐絕非渣男 監製拆解「視覺誤差」因由

對於 Oscar 的選擇，Bob 及監製 Manho 均開腔力撐 Oscar，阿Bob 更力挺 Oscar 絕非渣男，Bob：「了解咗覺得唔係嗰個 vibe，想轉（選擇）就係渣男？咁我諗地球上好多男人都係渣男嚟喎」、「大家唔好以為（佢哋）感情好深厚，大型水上樂園、五角枱（嘅拍攝）都係一日半日嘅事」、「絕對唔可以用渣男形容呢個男孩子，喺我嘅認知，希望大家可以理性同埋口下留情去留言」，並希望觀眾不要覺得有人爭或有人轉選擇就是壞人。

Manho：「有時佢哋見一日我哋剪成兩集，變相觀眾視覺會覺得係幾個星期，但其實可能佢哋只係見過兩、三次。」Bob 與 Manho 續指新一季《女神》描述的感情關係，比第一季更複雜，不適宜作比較，並鼓勵大家當全新的戀綜收看，Bob：「今輯由頭到尾都大兜亂，都係強調女仔可揀男仔、男仔亦都可以揀女仔，節目一開始機制就係咁，想大家知道原來可以更大膽、更勇敢去追求自己想要嘅 Mr/Mrs Right，講真男未婚、女未嫁，大家都仲有機會選擇，而當中一定會有情緒落差」、「知大家肉緊嘅………但我覺得唔需要去到人身攻擊或者惡意批評，大家唔需要咁勞氣」Manho：「今季確實一開始就唔想咁單一，所以感情走向一定複雜啲」、「希望觀眾食花生之餘都多啲理解同包容，故事好多時候都冇節目呈現出嚟咁簡單。」並透露後續將有更多「原來係咁」及「意想不到嘅發展」。