去旅行唔是奉旨幫你代購的

文: 9527
2016.04.08

 文:B612

圖:flickr(@jacobmar1ey)

一年去七八次旅行,除咗會俾人狂問:「你好有錢喎成日去旅行!」之外,仲有另一個煩惱 —— 所有人都當咗你撈代購嘅。

咩唔好再叫人旅行買手信,呢啲已經係好基本費事多講。去一轉旅行,循例買手信俾屋企同事朋友舊同學女朋友⋯⋯咁就幾舊水。其實係friend嘅,知你鍾意就會自動自覺買架啦,特登買啲未必啱洗嘅嘢係浪費我嘅金錢又浪費你嘅時間。

而家潮流係興,知你去台灣韓國日本,就準備定水蛇春咁長嘅清單麻煩你幫我買吖唔該晒 :) 上至化妝品電子產品下至幫佢女朋友買個bra都有,係筍過網購呀我同你講,起碼唔洗俾運費。

通常佢哋係send一大堆cap圖嚟話要買乜乜物物。我自己就要事先search定呢個牌子邊到有得賣,放落邊一日行程夾啲,好多時其實都係唔順路要夾硬兜遠路去。去到如果無款無色無碼,又要留喺原地直至佢覆我仲買唔買。個旅行先得嗰四五日,唔計頭尾搭飛機,齋幫人買嘢可能就用咗半日。

而且買親嘢都唔知點同朋友收返錢。有時唔同outlet買唔一定同網上標價一樣;幾個朋友啲嘢夾埋一齊買可能會有折;用外幣買要計滙率;唔夠現金嘅用信用卡又有手續費⋯⋯總之如此種種之後,單上面嘅價錢同我實際上付出嘅好少可係一樣。試過一次收得貴過幅cap圖嘅標價,就俾同事串:「嘩你以後淨係做代購都搵到食啦。」我 以 後 都 無 再 幫 呢 個 人 買 過 嘢。

仲有交收。好多時代購嘅嘢買完都係趕住俾返朋友,每次去完旅行後至少一個禮拜,日日放工嘅行程都係去勻港九新界交收。我試過捧住個台灣買嘅芝士蛋糕返公司,放工捧埋去酒吧生日party,完咗仲要送個蛋糕去朋友屋企樓下,慘過外賣仔。

我都試過請朋友幫我買嘢,但真係試過晒網購淘寶專業代購都搞唔掂,自己一年半載之內又唔會去嗰頭旅行先麻煩人哋。

下次有朋友去旅行嘅,就留啲空間俾人,自己上網搞掂啦!

 

本篇圖文獲作者B612授權刊登,未經准許,請勿轉載!

B612 Facebook:https://www.facebook.com/b612lpp/

 


作者的其他文章:
>> 開張附屬卡俾女朋友,不知幾有型
>> 今晚,我只係做咗一舊水人情

 

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【免費試用🎁】RMK全新底妝系列!↓

↓全新原生光感隔離霜 x 零瑕絲絹粉底液↓

↓全新原生光感隔離霜 x 零瑕絲絹粉底液↓

↓【免費送🎁】DPM點對點®床褥!!!↓

↓ 仲會幫您度身訂造出最適合的床褥 ↓

↓ 仲會幫您度身訂造出最適合的床褥 ↓