傷

文：求其花

西元2016年5月，28歲嘅我加左次人工，月薪正式超過左我老豆人生搵得最多錢嘅時候。

我係最平凡嘅公屋仔，細個屋企成日為錢嘈交，為左交我同阿妹嘅書簿費同上網費，每個月阿媽都要同爛賭老豆大戰一場先拎到返黎，老豆返兩份工，其中一份有得偷懶訓下覺，但總共加起上黎嘅工時每日都超過十五個鐘。返到黎又要同阿媽嘈一輪，先肯死死氣拎幾百蚊出黎了左件事。

我有心臟病，體力向來比較差。阿妹脾氣古怪，成績又麻麻，作為家庭主婦嘅阿媽成日都好擔心，又我地驚學壞又驚無咩娛樂，好細個嗰時，阿媽成日帶我地出入圖書館，衛斯理同亦舒嘅小說差唔多睇晒咁滯。返到屋企，洗衫煮飯拖地抹地當然要做，每個月月底重要考慮點樣拎錢返黎交書簿費。

我地窮得滯，政府唔洗我地比錢交學費，而租同水電煤，因為老豆都要喺度住，都要沖涼開燈同叫老婆煮飯食，所以呢方面比較疏爽。而講到我同阿妹嘅洗費，諸於去學校旅行嘅錢同書簿費，佢一定會問長問短，甚至唔比。

但總之阿媽最後都會變到比我地，我經常覺得女人嘅精神力真係超級無敵咁犀利，一個男人有正職有賺錢，面對責任，每個月都想逃避；工無都份，日日做完一堆家務重要諗計問人拎錢嘅家庭主婦，反而無諗過放棄仔女。

有一年，我記得好似中四，我膽粗粗自己走左入老豆房，向佢痛陳利害，話比佢知養兒防老嘅概念，主旨係只要每月比四千蚊，花仔同花妹就可以得到適當嘅照顧，同埋三餐溫飽啦！呢個計劃後期，花仔同花妹出左身都會養返你轉頭添！我重記得當時好驚，完全唔敢用談判mode，想用一個灰諧啲嘅講法去包裝成件事。

助養喎！做多啲善事，死左唔洗落地獄嘛！我當下覺得自己扮緊山區兒童，自我催眠係一種幾好嘅慰藉──只要我認為自己係扮緊，我自己就唔會係嗰樣野，馬騮唔可以扮馬騮架嘛！只有你唔係馬騮，你先可以扮馬騮。

嗯，成件事顯得無咁悲哀。

「山區兒童都唔洗自己Sell自己。」科學話女仔嘅心智發育比男人早，我好認同，因為我個妹正正企左喺我後面，佢當時升中二，已經睇穿成件事有幾咁滑稽，Sell嘅對象重要係自己老豆。
「出去！」肥腫嘅老豆訓喺床邊，背對住我地兩個，直接兩個字令我地收聲。

「求個垃圾托咩。」阿妹當時粗口已經流利過我，何況呢啲初級粗鄙用語。有次我當時女朋友Bianca上黎重比佢食煙個樣嚇親。

突然，老豆轉身坐起，一副想食人嘅眼神望住阿妹，我望到佢充滿紅筋嘅眼珠，面無血色嘅臉龐，我知道長期返兩份工，已經慢慢咁摧殘緊佢身體。而佢爛賭呢件事，則摧毀緊呢個家庭。

「垃圾？你講咩話？你地可以好似我咁搵咁多錢咩！」佢大叫，我好肯定大聲到隔離屋都聽到，當時個情境真係好似一個骷髏骨頭喺度狂叫，而你唔會知個骷髏骨頭會唔會突然撲上黎咬人。阿妹比佢嚇到成個膊頭縮起，阿媽即刻入黎調停，推返我地兩個出去。

呢啲關係糾纏左十幾年，等到終於可以離婚，我同阿妹已經可以靠補習窮窮地自理生活，唔再需要嗰一千幾百，同時學識當老豆透明。人生就係咁，想做嗰時無能力做，做到嗰時，做唔做已經唔重要。

……

「比心機啲做，過完試用期就加四成人工嘅人唔多，老細好明顯睇你。」5月17日，我直屬上司拍拍我膊頭，自己隻馬好使好用，佢當然開心。

我微笑點頭，敷衍幾句多謝公司比機會。

走嗰時，我打比Bianca，一個離婚無耐嘅前女友，同佢講我加左人工。佢除左想屈我請食飯，重問我：「你阿爸呢個人工養得掂你地，你會唔會搵返個女朋友，真係諗下組織個家庭？」

呢句說話出自岩岩離婚嘅女人口中，古怪到有種幽默感，我忍唔住笑。

「唔啦，知道爸爸對細路仔影響有幾大，我已經唔敢成家立室。我好傳統架，想老婆仔女當我英雄，一家之主嘛……責任好大架……」每次講到家呢個話題，我個腦會開始彈出一啲詞彙，無辦法拼湊成完整句子。

我嘅黑暗歲月，Bianca好清楚，因為嗰時佢係我女朋友，而且佢係二奶個女，好少見爸爸，更加明白父母對子女嘅重要性。

「……好啦！唔講呢啲啦！諗下買啲咩啦！試下唔好猶豫，三秒內即刻講出你第一個念頭！最想買嘅野！」Bianca好識睇人眉頭眼額，想慢慢帶開個話題。

然後我心入面忽然泛起當年嘅光景，每個為錢發愁嘅月底，每次阿媽要為生活費東奔西撲，老豆愛理不理，每日返完十五個鐘工，返黎淨係開大個冷氣訓覺，訓醒又返第二日工……阿妹成日比老豆大聲嗌而嚇到喊，繼而嚇到唔識喊，唔再喊，每個人之間嘅溝通愈黎愈少，最後所有人嘅價值觀都慢慢扭曲，最後返唔到轉頭。

「我想買返個屋企。」我真係好想回到過去咁，張開雙臂抱住每一個人，每一個因為錢而歇斯底里嘅家人，喺耳邊靜靜講一句：「無事啦，我搵到錢返黎啦。」

「哇，咁大想頭，依家買樓好難架……Gabriel同我加埋六萬幾供樓先叫無岩岩好剛用……」Bianca以為我講緊買樓。

……

「都過左十幾年啦，你重覺得好痛？」沉默左五秒，Bianca終於明白我意思。

「唔係，無野啦，你準備Book檯啦，請你食Buffet。」我匆忙收線。

收工時間，行入地鐵，依然係迫到無人有。香港地就係咁，節奏快到諗唔到其他野，只有遇到某啲事，先會成為一個契機令你回想起過去。返到屋企，成屋黑晒，開燈，阿媽阿妹都唔喺度，想打比佢地一齊食晚飯，先知大家各自已經有節目，我又要再落多次樓買外賣，先知道原來我地一早變左三個獨立嘅個體。

嘆口氣，再多情緒，生活一樣要過。

「都過左十幾年啦，你重覺得好痛？」前女友嘅致命一擊，又黎擾亂我思緒。

唔痛，只不過，家不成家，長遠黎講，喺任何方面，真係好傷。

本篇圖文獲作者求其花授權刊登，未經准許，請勿轉載！

求其花 Facebook：https://www.facebook.com/whateverfa/

作者的其他文章：

>> 像南記酸菜般的男人啊！