陳柏宇老婆符曉薇5月陀第二胎大量出血 證實宮外孕切除左邊輸卵管保命
歌手陳柏宇與符曉薇Leanne在2017年結婚，婚後育有一女Abigail，一家三口幸福美滿，不時在網上分享生活點滴。不過，Leanne日前就拍攝了一條短片，透露自己在5月懷上第二胎，可惜經檢查後發現是宮外孕，更要做手術切除輸卵管。
Leanne拍片剖白從懷有第二胎到證實宮外孕的心路歷程，她透露今年5月發現自己懷上第二胎，一家人都非常高興。大約過了一兩個星期，她開始出血及腹部持續性疼痛。
經過醫生檢查後，暫時沒有發現問題，但不排除有宮外孕的情況。去到下一次覆診，Leanne形容「腹部好痛，痛到我以為我自己盲腸炎，直情想暈低，我標晒冷汗，係超級痛超級痛」。而醫生亦發現其子宮內大量出血，同時證實Leanne第二胎為宮外孕。
Leanne指自己十分記得當日是6月1日：「我哋好急咁入咗醫院啦，亦都好urgent去做呢個手術，做完呢個手術醫生話係宮外孕，我爆咗條輸卵管，咁所以一定要去切除咗條輸卵管」。她補充指，由於胎兒著床於左邊輸卵管，導致輸卵管爆裂。而醫生讓她選擇修復或切除輸卵管，亦向她解釋如果修補輸卵管仍會留有受損的痕跡，容易在同一個地方發生宮外孕。最後Leanne選擇切除左邊輸卵管保命。
她形容當時心情低落，一度自欺欺人幻想胎兒仍存在，直言希望生多一個BB與女兒作伴。幸好她在一位經歷過2次宮外孕的好友開解下，逐漸走出陰霾，心情逐漸平復。樂觀的Leanne表示不會輕易被打敗，又透露疫情過後會繼續造人，又叫大家不用太擔心，希望自己的分享能夠幫助到有需要的人。
今日她再在IG分享更多細節：「有網友問點解咁遲先知宮外孕，早啲去產檢就可以避免爆輸卵管，因為疫情底下所以避免成日去睇醫生，所以遲咗去睇先搞到咁。第二大家問陳生點樣氹我，佢繼續做返自己繼續搞笑，令到好緊張嘅氣氛變得搞笑。」
Leanne更分享準備入手術室前拍攝的短片，片中陳柏宇搞gag令老婆放鬆：「成日都冇飲過水同食野 勁口渴，護士幫我吊鹽水，陳生揸住杯水過嚟同我杯鹽水乾杯，雖則佢不嬲都賤格，但就係令到我笑返，我係醫院嗰幾日佢日日都過嚟搵我，晚晚都同我FaceTime。我已經好足夠」。最後她分享手術後的照片，並表示已完全康復及感激母親的照顧：「第三張相就係做完手術嘅傷口，我做微創手術 開咗三個窿，個肚因為手術要吹脹，起碼一個月先完全還原，不過而家我完全康復啦，多謝大家嘅愛。」
港生活人氣本地熱話
【🎁免費送】HIZERO 輕量級F300潔地機！
↓簡單兩步登記贏清潔神隊友！↓
↓【限時搶⚡】Stecco Natura意式雪條↓
↓免費意式雪條｜杯裝意式雪糕買一送一↓
