網民求教:第一次租村屋 有乜嘢伏位要注意?附11大住村屋智慧

2022.04.27

好多人都覺得村屋好住過市區樓:實用面積大、間隔實用、窗外有靚景、如果有天台或地下花園,仲可以養狗同約吓朋友嚟BBQ……不過租村屋有好多要留意嘅細節位,同租市區樓唔同,例如泊車、上網……睇吓網民點樣講!

樓主第一次租屋,想試吓租村屋,喺連登討論區向網民求教有乜嘢伏位要注意,網民都好熱情分享心得:「留意返係咪獨立水錶電錶」、「來去水沖廁」、「最好租屋苑式,同埋唔好租地下,一來隱私差,二來落大雨屎水倒灌或者塞屎渠都係地下食先」、「盡量租近大路邊,如果唔係就要查吓返屋企條路係咪私家路,係就唔好租」。

網民建議盡量租屋苑式村屋,管理會好啲。

千祈唔好同業主一齊住!
原來租村屋,住邊層,同樓上樓下嘅生活習慣,絕對係租村屋其中一大伏位。「唔好睇少個天台,我斜對面果棟個mk佬,三日唔埋兩日就拉大隊開party,又劈又劏,仲要玩通宵,如果住佢樓下仲慘!」、「成日有人係你樓上party同出入曬衫種嘢,都幾煩!同埋3樓最怕漏水,上面冇玻璃屋/縫會幾熱下!」、「3樓共用小伏」、「同業主住同一棟會好辛苦」、「如果係佢自己(業主)social開,多fd,你咪PK?!正路想賺多少少錢,就租3樓加天台俾人啦!不過同意樓上,同業主一齊住真係唔好搞,遇着個好嘅就無嘢,撞到個痴線嘅真係會癲!」

如果業主住天台,而佢經常邀請朋友返嚟開party玩通宵,樓下租客其實幾大鑊!

泊車位月租幾多?
住村屋,交通真係一個問題。「另外你要留意埋交通問題,村巴班次密唔密,同埋好多時中間嘅站,出村都截唔到車,繁忙時間有機會啲人係頭站已經坐滿。」

如果打算自駕,泊車位都係一個好重要嘅考慮點。「你有冇問定車位幾錢?我樓下個停車場冇劃位, 愈泊愈多車,加上係旅遊景點,有時晏返嚟,啲位畀遊客泊晒。仲有我租屋果陣業主話車位幫我同村公所租,收$800;之後第日我自己入村公所問,原來$600就得!所以唔好完全信晒業主呀,佢連$200都想食我夾棍!」

若果租客自駕,請問清楚泊車位租金。

問清楚係咪上到網!
租村屋仲有好多伏位,租市區樓未必會遇到,例如上網!「仲有上網都要睇邊間公司有覆蓋,問定有幾多MB、之前我果度,畀盡得32MB,打風落雨一定斷,果日仲要有assignment交,喊出嚟!月費又貴,成300幾,襟住嚟搶!」

租屋前問清楚所在嘅村,係咪上到網,同埋有無寬頻。

租村屋11大智慧
有自稱「租咗村屋十幾年,三層都住過晒,依家住緊中層」嘅網民,綜合多年住村屋經驗,得出以下嘅住村屋智慧:
「1.google吓條村有無新聞有路霸
2.平房石屋唔好諗
3.睇埋寬頻到唔到,得兩間,老電PCCW同/鄉村電話即係萬匯
4.天台共享,即係唔係你用
5.棟屋位置會唔會比周圍低咗(雨季水浸),行出車路/大路會唔會天氣問題,有機會行唔到返唔到工(打風榻樹)
6.地下:多蚊蟲、大塵、樓上有機掉垃圾
7.三樓:夏天比較熱,冷氣費通常貴20~30%左右
8.中層/三樓:係窗口望望牆身糞渠有無直上天台,有啲無上到天台,只係中層/三樓咁上下,啲曱甴會沿住佢爬入屋,經冷氣機入屋
9.睇樓可以落雨/落完雨去睇,會睇到間屋有無漏水之類
10.唔好揀小全棟款內置樓梯,完全擺唔到家具
11.仲有最重要:地下會有機爆屎渠,啲屎會喺你馬桶倒灌出嚟,舊樓/新樓都會

住地下嘅話,唔單只多蚊蟲,仲會有機機遇上爆屎渠,啲屎會喺你馬桶倒灌出嚟!

住中層嘅話,除咗要擔心樓上樓下嘈,仲要擔心牆身糞渠無上到天台,曱甴會沿住糞渠爬入屋。

text/Joyce
photo/HKET圖片庫
=======
同場加映:
【蝸居睇樓團】鰂魚涌391呎溫馨新居 Tiffany Blue半開放式廚房、餐枱鞋櫃多功能組合櫃

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【隆重登場】香港咖啡地圖2022!↓

↓即睇精選50間咖啡店(附評分及介紹)↓

即睇精選50間咖啡店(附評分及介紹)

↓社群送禮!贏走人氣網上超市現金券!↓

多玩多中!立即參加!

多玩多中!立即參加!

評語

相關文章