住喺已買嘅公屋35年 但又買唔起私樓 想用40萬去裝修公屋究竟值唔值得?

2022.07.12

如果要全屋裝修往往都要用一大筆錢,閒閒哋都要成十幾二十萬,所以裝修前都真係要諗清諗楚,最近就有網民喺香港討論區上發帖尋求網民意見,表示自己住緊已買嘅公屋已經有35年,從來都未曾裝修過,而自己亦都買唔起私人樓,正在糾結到底好唔好用40萬去將公屋大裝修,一眾網民都紛紛提出唔同意見呀!

係自己物業就值得!裝修似啲樣都要咁嘅價!

樓主表示現居嘅公屋於20年前在租置計劃下以20萬買下,並住咗35年都未有裝修過,但一想到裝修所需嘅費用仲多過以前買樓所畀嘅錢,就覺得好似好唔抵,而自己雖然想住私樓,但自己收入並不多,儲蓄亦只有一百多萬,現時並無能力購買私人物業,所以就向一眾網民詢問自己到底好唔好去用40萬裝修現居嘅公屋。對於樓主嘅情況,有網民就認為係屬於自己嘅物業就值得使錢去裝修:「用咁多錢裝修,都十分合理,話哂都係自己屋。」、「我係你我攞一百萬出嚟裝修添呀!住過世㗎喎!」、「既然買咗,就係自己物業,實積抵過出面好多,就算用40萬裝修都抵,值裝」、「係自己間屋裝修當然值得!如果租公屋住,咁就吾值了。」

有網民就認為用40萬作全屋裝修係一個合理嘅價錢:「一D(啲)都唔過份!人工貴兼D(啲)物料又起晒價,裝修似D(啲)樣都要咁既價啦!」、「老實講,舊(樓)裝(修)的話差不多,我清水樓普通裝修都20個(20萬),舊裝要連埋拆野、舊喉換新,分分鐘要30個(30萬)以上」、「如果要大整三十萬都無乜走雞,當裝一次修住廿年,每年都係萬蚊啫,住得舒服啲,對自已好啲」,但亦有網民則建議樓主用較少錢作簡單裝修會比較好:「簡單裝修用20萬還可接受!」、「公屋簡(單)裝(修)喇,執下油換下傢俬,預廿萬樓下!」

有網民認為樓主現居的公屋已經買下,是屬於自己的物業,所以值得用40萬去裝修。

亦有網民認為今時今日花費40萬為全屋裝修屬合理價錢。

公屋質素差唔值得!外牆出事有錢都整唔到!

有部份網民就表示並唔值得,認為公屋問題多,質素亦相對較差,不建議樓主用一大筆錢去裝修:「公屋一般樓宇質素欠佳,不要花幾十萬裝修,因為樓上隨時漏水,又或者樓下話你漏水,到時你的裝修會大大破壞。」、「公屋質素較差,廁所位置最惡劣,廁所整到好靚都無用,水管水渠係死症」、「如果公屋我吾(唔)會啦,去staycation過下引(癮)就算」、「舊樓花幾十萬裝修好ON(戇)居」

另外有網民認為租置計劃嘅公屋外牆有潛在風險,應先搵人檢查然後再作決定:「先搵人檢查外牆有冇問題再決定做唔做室內裝修,租置最大鑊係外牆唔係你有錢就可以整,有啲租置就係個外牆出事,想整又整唔到,室內每年都因為外牆滲水要重新裝修」,亦有網民建議樓主將現居嘅公屋出售,再加錢去買私人樓或租樓:「賣公屋買私樓」、「賣咗佢,出去租屋更好」、「放咗間公屋補$換私樓咪得,咁簡單」、「賣咗佢加埋咪夠買舊些私樓囉。」

有網民認為公屋質素差,隨時有漏水等問題發生,不值得用數十萬去裝修。

亦有網民表示若公屋外牆有問題會難以解決,所以應先搵人檢查大廈外牆,然後再為裝修一事作決定。

text/Jonathan
photo/HKET圖片庫

============
同場加映:
【蝸居睇樓團】
沙田37年舊樓型格乾濕分離浴廁、客廳窗台巧變打卡位

用App賺U Fun換獎賞!

會員登入U Lifestyle App即可領取
迎新禮遇 150

立即登入領取

↓【送禮】送您5G智能電話及寵物店現金券!↓

↓ 立即分享貓狗相片 贏走豐富禮物!↓

立即分享貓狗相片 贏走豐富禮物!

↓「App限時搶」大派禮品↓

↓記得逢星期三3PM入App搶!↓

記得逢星期三3PM入App搶!

評語

相關文章