會所好好用又方便?但實際上冇時間用? 網民熱討:屋苑會所究竟有冇存在價值?

2022.08.15

大部分新落成嘅私人屋苑都會設有會所,唔知大家覺得住客會所又重唔重要呢?最近就有網民喺連登討論區上發帖,表示相信大部份人都唔會用會所嘅設施,並認為私樓會所嘅存在價值有限,結果就引起一眾網民熱烈討論:究竟屋苑會所有冇存在價值?

會所好處係唔使同人迫?最啱畀小朋友放電?
樓主向網民表示自己眼見會所內一般嚟講都係冇人,就算連健身室亦只得一、兩個人使用,因此就認為有超過九成嘅人都唔會用到會所嘅設施,並質疑到會所嘅存在價值:「存在有咩價值係唔係就係平時同人講屋企有會所?」,對於樓主嘅睇法,有網民就認為其實會所部份設施都多人使用:「你唔用唔代表其他人唔用,以前屋企個會所一到星期六日個泳池就要排隊,小朋友playhouse一至日都有人玩,gym都多人用」、「室內羽毛球場長期爆場,gym room同泳池都多人用」、「會所泳池健身室都算多人用喎,羽毛球場籃球場長期full」,亦有網民認為會所人流較少先係好處:「你都戇xx,會所個好處就係少人」、「人流少先係會所精髓,好想同人逼咩」、「淨係可以游水唔洗出去公共同d(啲)低等人士迫已經夠做」

有網民就唔認同樓主嘅說法,並講出有會所嘅好處:「會所有泳池、gym房、小朋友室內空間,就真係無x敵,星(期)六日拿幾支啤酒落泳池曬下太陽,公眾泳池就咪攪(搞)啦」、「落雨無地方拍拖,又唔想商場同人逼,會所唱k,包影院睇戲食壽司又一day」、「會所好好用喎,打波做gym都方便好多」、「日日做gym、游水、食早餐,打風落雨街都唔洗出又咩都做到晒」

另外有網民就認為若自己家庭當中有小朋友,對會所就會有更大嘅需要:「因為你哋冇小朋友jei(啫)」、「唔同階段有唔同需要啫,到你要帶小朋友去playhouse嗰時/小朋友要學游水嗰時,咪知會所有冇用囉」、「當你有小朋友時就極度有用,放假想安安靜靜午睡,叫工人帶班嘩鬼落兒童會所放電」、「會所有children playground,好多細路放學放假而(係)父母帶佢地落樓下放電既好地方,會所都會有出租廚房兼可容納廿人既派對房,畀住客煮完野食再招呼朋友,或做小朋友既生日party,好多有小朋友既家長禮拜日都會book黎用」

有網民認為會所內的健身室、泳池及球場等設施都對住戶非常方便。

有網民則認為會所有提供兒童遊樂設施,對於有小朋友嘅家庭會比較重要。

會所設施又少又舊?要返工根本冇時間用?
意見亦非一面倒,亦有網民認同樓主嘅說法,認為會所嘅價值對於一眾工作繁忙嘅上班族確實有限:「會所對樓價有用,但係對啲返緊工個啲成年人其實實質作用不大。原因係因為無時間用。會所係小朋友同老人家先最多用得著,特別係小朋友。」、「真,除非唔使返工,香港出名工時長,收得工會所都閂,到放長假又寧願去旅行,我見會所多數係長者同細路、工人」、「根本私樓會所既作用係因為屋企太細招呼唔到朋友,但一年有幾次要充大頭鬼哂命,所以叫啲朋友求其上樓望兩眼之後就帶佢地去會所算,平時自己打份牛工收工返到屋企攰到x街仲邊x度有閒情逸致去會所玩」

亦有網民認為部份會所嘅設施並不完善,大大減低了住戶使用會所嘅意欲:「設施又少,泳池又細,都係要出去join gym room」、「啲會所泳池細x到,話去會所游水果啲人係去玩水定游水」、「有啲係舊屋苑整呢啲得個殼,硬件太差機太屎,有啲就係爆booking爆到唔想book寧願出去做」、「啲gym room啲機爆皮,生銹都唔換,做一下都芝芝聲,泳池俾啲細路仔痾尿、老人浸浴池,我寧願去遠少少嘅泳灘游好過」、「新盤會所真係把x,Gym room無咩機,又細,仲要唔平,有時仲好多人,要做出去做好過,泳池又細,有好多連羽毛球場都無」

另外有網民就話有得揀嘅話寧願唔要會所:「會所係地產霸權既表現,起個(嗰)陣已經計左落樓價成本賣俾你,之後錢就佢賺晒,我就寧願住d(啲)舊式屋苑,實用、尺數大既屋苑好過」、「以前我租過啲有會所樓,落過去一兩次就冇去,不如用啲錢嚟(將)間屋買大一百呎,都唔使有會所,起碼自己日日歎到果(嗰)一百呎」、「得好小人係真係想要會所,大部份人都寧願你唔好x起會所賣平小小或者同樣價錢間屋大d(啲)」

有網民認為上班族其實並無太多時間去使用會所設施,會所對他們實質作用不大。

亦有網民認為某些會所的設施又舊又少,因而令不少住戶卻步。

有網民則表示會所對自己並非必要,買樓會偏向選擇冇會所但更平或更大的屋苑單位。

text/Jonathan
photo/HKET圖片庫

============
同場加映:
【蝸居睇樓團】鑽石山23年4房居屋型格翻新!深木色配花磚搶眼玄關+愛心玻璃觀鳥房

用App睇片‧賺積分‧換獎賞!

認住 U Fun 標誌「」, App內睇文同睇片可隨時捕捉U Fun彩蛋, 換領現金券及禮品!

開啟 App 成為會員賺U Fun!

↓【送禮】請您同毛孩免費住酒店!↓

↓立即分享寵物照片 贏走獎品!↓

↓立即分享寵物照片 贏走獎品!↓

↓正嘢!《社群》專區登錄App↓

↓必睇人氣生活+美食主題深度關注組↓

 ↓必睇人氣生活+美食主題深度關注組↓

評語

相關文章